Post News Media ព័ត៌មានជាតិ សង្ស័យអាងរថយន...

សង្ស័យអាងរថយន្តស៊េរីទំនើប! យុវជនម្នាក់ស្រវឹងបើករថយន្តអូឌី បុកពីក្រោយគោយន្តហើយចុះវាយគេទៀត ចំណែកសមត្ថកិច្ចស្រុកថាគ្មានករណីនេះ តែសមត្ថកិច្ចខេត្ត ថាមានករណីនេះ តែតិចតួច..

បន្ទាយមានជ័យ: បុរសម្នាក់បានរងរបួសធ្ងន់ និងរងកណ្តាប់ដៃពីសំណាក់អ្នកបើករថយន្តស៊េរីទំនើប ខណ:ដែលគាត់កំពុងបើកបរគោយន្តដឹកស្រូវ ហើយត្រូវរថយន្តស៊េរីទំនើបនោះបុកពីក្រោយ។

ហេតុការណ៍នេះកើតឡើងកាលពីវេលាម៉ោង៩យប់ ថ្ងៃទី២៥ ខែធ្នូ ឆ្នាំ២០១៨ នៅលើផ្លូវជាតិលេខ៥ ខាងកើតសាលាក្រហម ឃុំសំរោង ស្រុកអូរជ្រៅ ខេត្តបន្ទាយមានជ័យ។

មុនពេលកើតហេតុគេឃើញគោយន្តកន្ត្រៃដឹកស្រូវមួយគ្រឿង បើកបរក្នុងទិសដៅពីកើតទៅលិច លុះដល់ចំណុចកើតហេតុស្រាប់តែ មានរថយន្តមួយគ្រឿងម៉ាកអូឌី ពណ៌ស (ស្លាកលេខត្រូវបានម្ចាស់ដោះចេញក្រោយបង្កគ្រោះថ្នាក់) បើកបរដោយក្មេងជំទង់ឈាមរាវម្នាក់ ក្នុងស្ថានភាពស្រវឹងស្រា​ បានបោះពួយយ៉ាងលឿន ក្នុងទិសដៅស្របគ្នា បុកគោយន្តកន្ត្រៃផ្នែកកន្ទុយខាងឆ្វេង បណ្តាលឲ្យគោយន្តរេក្រឡាប់ក្បាលចុះក្រោម គម្ពប់ស្រូវរាយប៉ាយពេញផ្លូវ និងបង្កឲ្យអ្នកបើកគោយន្តម្នាក់រងរបួសធ្ងន់។ រីឯថយន្តរងការខូចខាតផ្នែកខាងមុខយ៉ាងដំណំផងដែរ។

ក្រោយកើតហេតុអ្នកបើកបររថយន្តបានចុះពីលើរថយន្ត រួចវាយទៅលើអ្នកបើកគោយន្តកន្ត្រៃទាំងកំហឹង និងចោទថា មកពីអ្នកបើកគោយន្តនេះឯងដែលធ្វើឲ្យខ្លួនជួបគ្រោះថ្នាក់ចរាចរណ៍ ក្រោយមកស្រាប់តែមានបុរសម្នាក់បានចេញមុខបកស្រាយថា មិនបានវាយអ្នកបើកគោយន្តនោះទេ តែអ្នកបើកគោយន្តនោះទេដែលឈ្លើយ ។

ក្រោយកើតហេតុសមត្ថកិច្ចនគរបាលចរាចរណ៍ជើងគោកនៃស្នងការនគរបាលខេត្តបន្ទាយមានជ័យ បានចុះដល់ចំណុចកើតហេតុ ធ្វើការវាស់វែង រៀបចំសណ្តាប់ធ្នាប់លើផ្លូវសម្រួលចរាចរណ៍ និងយករថយន្តបង្ក និងគោយន្តមករក្សាទុកនៅស្នងការដ្ឋាននគរបាលខេត្តបន្ទាយមានជ័យ ដើម្បីដោះស្រាយតាមនីតិវិធីច្បាប់។

ក្នុងករណីនេះដែរ Post News បានទំនាក់ទំនងទៅកាន់ជំនាញចរាចរណ៍ស្រុកបានឆ្លើយតបមកវិញថា មិនមានករណីនេះទេ តែប្រហែលជាមាននៅខាងប៉ោយប៉ែត។ បន្ទាប់មក Post Newsបានទំនាក់ទំនងទៅកាន់ខាងចរាចរណ៍ខេត្តបន្ទាយមានជ័យ បានឆ្លើយថា ពិតជាមានករណីនេះមែន ប៉ុន្តែតិចតួចទេ និងបានចេញទៅបាត់អស់ហើយ៕