ភ្នំពេញៈ បុរសម្នាក់វ័យប្រហែល៤០ឆ្នាំ ម្នាក់ស្រវឹងធ្លាក់ភ្នែកបើករថយន្តឡិចស៊ីស LX470 មួយគ្រឿងក្នុងល្បឿនយ៉ាងលឿន ហើយក៏ជ្រុលទៅបុកនិងក្បាលព្រួញពុះចែកទ្រូងផ្លូវ កាលពីវេលាម៉ោង១២កណ្ដាលអធ្រាត្រ ថ្ងៃទី២៧ ខែធ្នូ ឆ្នាំ២០១៨ ត្រង់ចំណុចខាងមុខផ្សារសេនជូរី តាមបណ្ដោយមហាវិថីសហព័ន្ធរុស្ស៊ី ស្ថិតក្នុងសង្កាត់កាកាបទី១ ខណ្ឌពោធិ៍សែនជ័យ។
តាមប្រភពព័ត៌មានពីកន្លែងកើតហេតុបានឲ្យដឹងថានៅមុនពេលកើតហេតុគេឃើញបុរសខាងលើបើកបររថយន្តមួយគ្រឿងម៉ាក ឡិចស៊ីស LX470 ពណ៌ស្ករ ពាក់ស្លាកលេខ ភ្នំពេញ 2AB-2610 ។ ដោយធ្វើដំណើរក្នុងសភាពស្រវឹងជោកជាំ តាមបណ្ដោយមហាវិថីសហព័ន្ធរុស្ស៊ី និងក្នុងល្បឿនយ៉ាងលឿន ទិសដៅបើកកមកស្ពានអាកាសផ្សារដីហុយឆ្ពោះទៅប្រលានយន្តហោះពោធិ៍ចិនតុង។ លុះមកដល់ចំណុចកើតហេតុ ស្រាប់តែរថយន្តខាងលើក៏រេចង្កូតជ្រុលទៅបុកនិងក្បាលព្រួញពុះចែកទ្រូងផ្លូវចំពេញទំហឹងបណ្ដាលឲ្យរថយន្តកៀបជាប់ទៅមុខលែងរួចរងការខូចខាតផ្នែកខាងមុខយ៉ាងដំណំ រីឯរបាំងថ្មពុះចែកទ្រូងផ្លូវរងការខូចខាតវៀចបន្តិចបន្តួច តែសំណាងល្អដែលមិនបង្កឲ្យមាននរណាម្នាក់រងរបួស។
ក្រោយពេលកើតហេតុសមត្ថកិច្ចមូលដ្ឋានក៏បានចុះមក ដល់ចំណុចកើតហេតុហើយបានទាក់ទងទៅសមត្ថកិច្ចជំនាញឲ្យចុះមកធ្វើការវាស់វែងនិងស្ទូចយករថយន្តបង្ករួមទាំងអ្នកបើកបរ បញ្ជូនទៅកាន់ការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំធ្វើការដោះស្រាយគ្នាទៅតាមផ្លូវច្បាប់នៅពេលក្រោយ៕
មតិយោបល់