សៀមរាប: លោកឧត្តមសេនីយ៍ត្រី ភឹង ចិន្តារ៉េត ស្នងការរងខេត្តសៀមរាប ទទួលផែនព្រហ្មទណ្ឌ បានប្រាប់Post Newsថា នៅវេលាម៉ោង១២និង០០នាទី ថ្ងៃទី៣១ ខែធ្នូ ឆ្នាំ២០១៨ មានករណីមនុស្សស្លាប់នៅព្រលានយន្តហោះខេត្តសៀមរាប។
បន្ទាប់ពីស្លាប់សាកសពត្រូវបានដឹកតម្កល់ទុកនៅក្នុងមន្ទីរពេទ្យបង្អែកខេត្តសៀមរាប ដោយសាកសពសមត្ថកិច្ចមិនទាន់ស្គាល់អត្តសញ្ញាណឡើយ។
លុះដល់ម៉ោង១៤និង៣០នាទីថ្ងៃដដែល កម្លាំងសមត្ថកិច្ចសហការជាមួយកម្លាំងបច្ចេកទេស និងមានការចូលរួមពីអ្នកគ្រប់គ្រងព្រលានយន្តហោះ ចុះសាកសួរសាក្សី ពិនិត្យកន្លែងកើតហេតុ និងធ្វើការពិនិត្យទៅលើកាំមេរ៉ាសុវត្ថិភាព។
ជាក់ស្តែងតាមការពិនិត្យលើកាំមេរ៉ា គឺ នៅវេលាម៉ោង៥និង០៣នាទីព្រឹក ថ្ងៃទី៣១ខែឆ្នាំដដែល ឃើញសកម្មភាពមនុស្សម្នាក់បានដើរទៅរកយន្តហោះស្កាយ។
បន្ទាប់មកបន្តដើរទៅJCហើយបន្តទៅយន្តហោះ កើតហេតុ ឡានម៉ី ដោយមនុស្សម្នាក់នោះ បានដើរទៅដេកនៅក្នុងកន្លែងកង់របស់យន្តហោះ លុះដល់ម៉ោង១០និង២០នាទី យន្តហោះបានធ្វើការហោះហើរ ដោយមិនបានដឹងថាមានមនុស្សចូលទៅសម្ងំក្នុងកង់យន្តហោះឡើយ។
តាមការបំភ្លឺសាក្សីឈ្មោះ លឿម រុំ ភេទប្រុស បានឲ្យដឹងថា នៅវេលាម៉ោងប្រហែល១០និង២០នាទីថ្ងៃទី៣១ ខែធ្នូ ឆ្នាំ២០១៨ ពេលខ្លួនកំពុងធ្វើការក៏បានឃើញយន្តហោះដែលកំពុងតែហោះហើរ បានកម្ពស់ប្រហែល៣០ម៉ែត្រ ស្រាប់តែឃើញមានមនុស្សម្នាក់ធ្លាក់ពីកង់យន្តហោះដែលមានចម្ងាយពីខ្លួនប្រហែល២០០ម៉ែត្រ ។
តាមការពនិត្យរបស់ជំនាញបច្ចេកទេស សាកសពស្លាប់មានសភាព បាក់ដៃជើងរយះជើងភ្លៅ។
បច្ចុប្បន្ន សាកសព សមត្ថកិច្ចនៅមិនទាន់កំណត់អត្តសញ្ញាណបាននោះទេ៕
មតិយោបល់