ភ្នំពេញៈ ករណីគ្រោះថ្នាក់ចរាចរណ៍ រថយន្តស៊េរីទំនើបមួយគ្រឿងម៉ាក BMW បោះយ៉ាងលឿន ទៅបុករថយន្តក្រុងមានដឹកអ្នកដំណើរ បណ្តាលឲ្យរងការខូចខាតយ៉ាងដំណំ កាលពីវេលាម៉ោង៩ និង១២នាទីយប់ថ្ងៃទី៣ ខែមករា ឆ្នាំ២០១៩ តាមបណ្តោយផ្លូវជាតិលេខ៦ នៅចំណុចបុរីសុភមង្គល ស្ថិតនៅក្នុងសង្កាត់ជ្រោយចង្វារ ខណ្ឌជ្រោយចង្វារ។
សមត្ថកិច្ច បានឲ្យដឹងថា មុនពេលកើតហេតុ គេឃើញរថយន្តក្រុងដឹកអ្នកដំណើរមួយគ្រឿង ម៉ាកហ៊ីយ៉ាន់ដាយ ពណ៌ទឹកប្រាក់ ពាក់ស្លាកលេខ ភ្នំពេញ ៣D-៦៤០៥ ធ្វើដំណើរផ្លូវជាតិលេខ៦ ក្នុងទិសដៅពីជើងទៅត្បូង មកដល់ចំណុចកើតហេតុ ស្រាប់តែមានរថយន្តស៊េរីទំនើបមួយគ្រឿង ជិះគ្នា៤នាក់ជាជនជាតិចិន ក្នុងនោះមានស្ត្រី៣នាក់ ជាអ្នករួមដំណើរ ចំណែកបុរសម្នាក់ជាអ្នកបើកបររថយន្តម៉ាក BMW ពណ៌ខ្មៅ ពាក់ស្លាកលេខ ភ្នំពេញ ២AI-១៥៥៥ ធ្វើដំណើរចេញមកពីក្នុងបុរីមួយកន្លែង ក្នុងល្បឿនយ៉ាងលឿនមិនប្រយ័ត្ន ក៏ជ្រុលចង្កូតទៅបុកពីមុខរថយន្តក្រុងពេញទំហឹង បណ្តាលឲ្យរថយន្តក្រុងរងការខូចខាត ខ្ទេចអស់មួយចំហៀងខាងឆ្វេង និងបែកកញ្ចក់មុខ រីឯរថយន្ត BWM វិញ បានរងការខូចខាតខ្ទេចទ្វារខាងស្តាំ និងបែកកញ្ចក់ខាងមុខផ្នែកខាងស្តាំ ប៉ុន្តែសំណាងល្អភាគីអ្នកជិះក្នុងរថយន្តទាំងសងខាងមិនមានរងរបួសទេ។
ក្រោយពេលកើតហេតុសមត្ថកិច្ច បានចុះធ្វើការវាស់វែង និងយករថយន្តទាំងសងខាង ទៅរក្សាទុកនៅការិយាល័យចរាចរណ៍ផ្លូវគោក ដើម្បីរង់ចាំដោះស្រាយគ្នាពេលក្រោយទៀត៕
មតិយោបល់