ផ្ទះ ព័ត៌មានជាតិ រដ្ឋបាលរាជធាន...

រដ្ឋបាលរាជធានីភ្នំពេញ៖ ពុំមានគម្រោងរុះរើផ្សារដើមគ និងតម្រូវឲ្យអាជីវករធ្វើការផ្លាស់ប្តូរទីតាំងអាជីវកម្មរបស់ខ្លួន ទៅទីតាំងថ្មីណាមួយឡើយ!

0

ភ្នំពេញ: នៅព្រឹក​ថ្ងៃទី០៤ ខែមករា ឆ្នាំ២០១៩ រដ្ឋបាលរាជធានីភ្នំពេញ បានរៀបចំសន្និសីទសារព័ត៌មាន ស្តីពីការរៀបចំផ្សារបន្លែ ផ្លែឈើបោះដុំ និងចំណតរថយន្តនៅតំបន់បឹងតាមោក ក៏ដូចជាជូនដំណឹងដល់បងប្អូនប្រជាពលរដ្ឋ ពិសេសអាជីវករលក់ដូរនៅផ្សារដើមគទាំងអស់ មេត្តាជ្រាបជៀសវាងមានការភន្ត័ច្រឡំដោយសារមានព័ត៌មានមួយចំនួនបានផ្សព្វផ្សាយថា រដ្ឋបាលរាជធានីភ្នំពេញ មានគម្រោងរុះរើផ្សារដើមគ ស្ថិតនៅសង្កាត់ផ្សារដើមគ ខណ្ឌទួលគោក ដើម្បីធ្វើការវិនិយោគជូនវិស័យឯកជនវិញ និងរើបងប្អូនអាជីវករទៅទីតាំងផ្សារថ្មីនៅបឹងតាមោក ដោយផ្អែកលើលិខិតលេខ ៨២៧ សជណ ចុះថ្ងៃព្រហស្បតិ៍ ៦រោច ខែទុតិយាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី០២ ខែសីហា ឆ្នាំ២០១៨ របស់ទីស្តីការគណ:រដ្ឋមន្ត្រី។

ក្នុងសន្និសីទសារព័ត៌មាននេះរដ្ឋបាលរាជធានីភ្នំពេញ សូមបញ្ជាក់សារជាថ្មីថា រដ្ឋបាលរាជធានីភ្នំពេញ ពុំមានគម្រោងរុះរើផ្សារដើមគ ឬតម្រូវឲ្យអាជីវករកំពុងលក់ដូរនៅផ្សារដើមគ ធ្វើការផ្លាស់ប្តូរទីតាំងអាជីវកម្មរបស់ខ្លួន ទៅទីតាំងថ្មីណាមួយឡើយ។ ដោយឡែក គម្រោងសាងសង់ផ្សារនៅបឹងតាមោក គឺដើម្បីសាងសង់ជាផ្សារផ្គត់ផ្គង់បន្លែ ផ្លែឈើ និងជាចំណតរថយន្ត ក្នុងន័យបន្ថែមជាទីតាំងផ្សារបោះដុំមួយកន្លែងផ្សេងទៀត ដើម្បីជួយសម្រួលដល់ការប្រកបអាជីវកម្ម ក៏ដូចជាដើម្បីកាត់បន្ថយ និងឈានដល់ការលុបបំបាត់ការរំលោភយកចិញ្ចើមផ្លូវ ទ្រូងផ្លូវសាធារណ: ដើម្បីធ្វើជាទីតាំងលក់បន្លែផ្លែឈើ ដែលបង្កការកកស្ទះចរាចរណ៍ ប៉ះពាល់ដល់បរិស្ថាន សណ្តាប់ធ្នាប់ និងអនាម័យតាមដងផ្លូវ។

អាស្រ័យដូចបានជម្រាបជូនខាងលើ សូមបងប្អូនប្រជាពលរដ្ឋ ពិសេសអាជីវករផ្សារដើមគមេត្តាជ្រាប និងរក្សាភាពស្ងប់ស្ងាត់ ប្រកបរបរទទួលទានជាធម្មតា និងផ្តល់ជំនឿទុកចិត្តមកលើអាជ្ញាធរដែលជានិច្ចជាកាល យកចិត្តទុកដាក់ចំពោះជីវភាពប្រជាពលរដ្ឋ ក៏ដូចជាអាជីវករលក់ដូរនៅតាមទីរួមផ្សារនានាក្នុងរាជធានីភ្នំពេញ៕

Loading...

Leave a Reply

This site uses Akismet to reduce spam. Learn how your comment data is processed.