ពោធិ៍សាត់: មានករណីគ្រោះថ្នាក់ចរាចរណ៍មួយបានកើតឡើង ខណ:ដែលមានរថយន្តម៉ាកសាំយ៉ុង ពណ៌ស ពាក់ស្លាកលេខ ភ្នំពេញ 2AE-4710 បានបើកធ្លាក់ផ្លូវដោយខ្លួនឯង បណ្តាលឲ្យអ្នកបើកបររថយន្តស្លាប់ក្រោយបញ្ជូនទៅមន្ទីរពេទ្យ។ ចំណែក៣នាក់ទៀតរងរបួសធ្ងន់និងស្រាល ត្រូវបានបញ្ជូនទៅសង្គ្រោះនិងព្យាបាល។
ហេតុការណ៍នេះកើតឡើងនៅម៉ោង៤និង៣០នាទី ព្រឹកថ្ងៃទី៦ ខែមករា ឆ្នាំ២០១៩ លើកំណាត់ផ្លូវជាតិលេខ៥៥ ចន្លោះគីឡូម៉ែត្រលេខ៩៤-៩៥ ភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិ៍សាត់។
សមត្ថកិច្ចបានឲ្យដឹងថា អ្នកបើកបររថយន្តមានឈ្មោះ កៀន ភេទប្រុស អាយុ៤០ឆ្នាំ រស់នៅភូមិតានាង ឃុំត្រាំងអំពិល ស្រុកសំរោងទង ខេត្តកំពងធំ របួសធ្ងន់ បញ្ជូនទៅមន្ទីរពេទ្យខេត្តពោធិ៍សាត់ និងរួមដំណើរ ០៣ នាក់ មានឈ្មោះដូចខាងក្រោម៖
១.ឈ្មោះ សួង សុខបញ្ញា ភេទស្រី អាយុ២០ឆ្នាំ របួសធ្ងន់
២.ឈ្មោះ ពៅ សុខុម ភេទប្រុស អាយុ២០ឆ្នាំ របួសស្រាល
៣.ឈ្មោះ សុខា ភេទប្រុស អាយុ២៦ឆ្នាំ របួសស្រាល។ ទាំង៣នាក់រស់នៅភូមិថ្មគោល ឃុំថ្មគោល ស្រុកពញាឯម ខេត្តកណ្ដាល ត្រូវបានបញ្ជូនទៅមន្ទីពេទ្យខេត្តពោធិ៍សាត់។ ដោយឡែកអ្នកបើកបរថយន្តស្លាប់ក្រោយបញ្ជូនទៅមន្ទីរពេទ្យ។
ចំណែក មូលហេតុ អ្នកបើកបរងងុយដេក ហើយក្រោយកើតហេតុ សមត្ថកិច្ចបានវាស់វែងយកវត្ថុតាងទៅរក្សាទុកនៅអធិការដ្ឋាននគរបាលស្រុកវាលវែង ៕
មតិយោបល់