ភ្នំពេញៈ បុរសម្នាក់ស្រវឹងជោកជាំ បើករថយន្តតូយ៉ូតាព្រូសមួយគ្រឿងបោះពួយយ៉ាងលឿន រួចក៏ទៅបុកក្បាលព្រួញពុះចែកទ្រូងផ្លូវបណ្តាលឲ្យដាច់ក្រឡេទៅមុខលែងរួច កាលពីវេលាម៉ោង៨និង២០នាទីយប់ ថ្ងៃទី០៦ ខែមករា ឆ្នាំ២០១៩ ត្រង់ចំណុចខាងមុខមន្ទីរពេទ្យព្រះកុសុមៈ តាមបណ្ដោយផ្លូវ២៧១ ស្ថិតក្នុងសង្កាត់ទឹកថ្លា ខណ្ឌសែនសុខ។
តាមប្រភពព័ត៌មានពីកន្លែងកើតហេតុបានឲ្យដឹងថានៅ មុនពេលកើតហេតុ គេឃើញបុរសខាងលើបើកបររថយន្តមួយគ្រឿងម៉ាក តូយ៉ូតាព្រូស ពណ៌ទឹកស ពាក់ស្លាកលេខ ភ្នំពេញ 2AA-5028 ក្នុងស្ថានភាពស្រវឹងជោកជាំ តាមបណ្ដោយផ្លូវ២៧១ ទិសដៅពីជើងទៅត្បូង និងក្នុងល្បឿនយ៉ាងលឿន។ លុះមកដល់ចំណុចកើតហេតុ ស្រាប់តែរថយន្តខាងលើក៏បានរេចង្កូតទៅខាងឆ្វេងជ្រុលទៅបុកនឹងក្បាលព្រួញពុះចែកទ្រូងផ្លូវចំពេញទំហឹង បណ្ដាលឲ្យវៀចអស់មួយកង់។ ចំណែកឯរថយន្តបង្ករងការខូចខាតកំពិតកាងនិងដាច់ក្រឡេកង់ខាងមុខចំហៀងខាងឆ្វេង ទៅមុខលែងរួច ហើយនៅក្នុងហេតុការណ៍នេះគឺមិនបណ្ដាលឲ្យមានអ្នករងរបួសនោះទេ គ្រាន់តែបណ្ដោយឲ្យខូចខាតសម្បត្តិសារធារណៈតែប៉ុណ្ណោះ។
ក្រោយពេលកើតហេតុសមត្ថកិច្ចមូលដ្ឋានក៏បានចុះមក ដល់ចំណុចកើតហេតុបានទាក់ទងទៅសមត្ថកិច្ចជំនាញឲ្យចុះមកធ្វើការវាស់វែងនិងស្ទូចយករថយន្តបង្ករួមទាំងអ្នកបើកបរ បញ្ជូនទៅកាន់ការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំធ្វើការដោះស្រាយគ្នាទៅតាមផ្លូវច្បាប់នៅពេលក្រោយ៕
មតិយោបល់