ព័ត៌មានជាតិ

​ល្បិចខ្លាំងមែន..ចុងក្រោយនៅតែជាប់ខ្នោះដដែល!

​កណ្តាល: សមត្ថកិច្ចឃាត់ខ្លួនជនសង្ស័យ២នាក់ ក្នុងចំណោមបក្ខពួក៥នាក់ ពាក់ព័ន្ធនឹងករណី​អំពើលួច​ទម្លាក់យោង កាលពីវេលាម៉ោង៧និង៣០នាទី ថ្ងៃទី០៧ ខែមករា ឆ្នាំ២០១៩ នៅចំណុចផ្សារសំរោងធំ ភូមិស្ទឹង២ ឃុំសំរោងធំ ស្រុកកៀនស្វាយ ខេត្តកណ្តាល។

ជនរងគ្រោះមានឈ្មោះ អៀង ស្រីស្រស់ ភេទស្រី អាយុ២៨ឆ្នាំ មុខរបរកម្មកររោងចក្រ មានទីលំនៅភូមិព្រែកត្រែង ឃុំសំរោងធំ ស្រុកកៀនស្វាយ ខេត្តកណ្តាល។ ជនសង្ស័យ​៥នាក់ ទី១​ឈ្មោះ ដួង សុខន ភេទប្រុស អាយុ៤៦ឆ្នាំ ស្រុកកំណើតភូមិក្រាំងកណ្តាល ឃុំប្រាំបីមុំ ស្រុកទ្រាំង ខេត្តតាកែវ ស្នាក់នៅ​ផ្ទះជួល សង្កាត់ទឹកល្អក់ ខណ្ឌសែនសុខ រាជធានីភ្នំពេញ មុខរបររត់ម៉ូតូឌុប(ឃាត់ខ្លួន)​។ ទី២​ឈ្មោះ ប៊ុន ហាន ភេទប្រុស អាយុ៤១ ឆ្នាំ ស្រុកកំណើតភូមិជ្រៃបាក់ ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ស្នាក់នៅ ផ្ទះជួលកាណាឌីយ៉ា រាជធានី​ភ្នំពេញ មុខរបរ រត់ម៉ូតូឌុប(ឃាត់ខ្លួន)​។ ទី៣​ឈ្មោះ ដា មុំ ភេទស្រី អាយុ៣៥ឆ្នាំ ទីលំនៅមិនពិតប្រាកដ(គេចខ្លួន)​។ ទី៤​ឈ្មោះ ស្រី ភេទស្រី អាយុ៣៦ឆ្នាំ ទីលំនៅមិនពិតប្រាកដ(គេចខ្លួន)​។ និងទី៥-ឈ្មោះ ថន ភេទប្រុស អាយុ២៧ឆ្នាំ ទីលំនៅមិនពិតប្រាកដ(គេចខ្លួន)។

សម្ភារ:បាត់បង់​៖ ខ្សែកមាសទម្ងន់​៨​ជី, ក្រវិលមាស១គូ​០.៥​ជី, ចិញ្ចៀនប្លាកទីន១វង់ ៥ជី។

វត្ថុតាងចាប់យក​៖ ម៉ូតូ​២គ្រឿង(១-ម៉ូតូហុងដាសេ១២៥ ពណ៌ខ្មៅ ស៊េរីឆ្នាំ​២០០៨ ពាក់ស្លាកលេខ តាកែវ 1C-6039,​២-ម៉ូតូហុងដា សេ១២៥ ពណ៌ខ្មៅ ស៊េរីឆ្នាំ២០១៧ ពាក់ស្លាកលេខ ភ្នំពេញ1GN-8501)​។

នៅថ្ងៃខែឆ្នាំនិងពេលវេលាដូចខាងលើ ជនរងគ្រោះបាន​ពរកូនចូលក្នុងផ្សារសំរោងធំដើម្បីរកទិញម្ហូប ពេលនោះក្រុមជនសង្ស័យជាមនុស្សស្រីម្នាក់បានមកឈរពីមុខជនរងគ្រោះនិងមានមនុស្សប្រុសម្នាក់(ជនសង្ស័យ) បានមកនិយាយខ្សឹបប្រាប់មនុស្សស្រី(ជនរងគ្រោះ)ថា៖ បងឯងមានរើសកាបូប
លុយខ្ញុំទេ រួចហើយក៏ដើរទៅបាត់។ បន្ទាប់មកមានមនុស្សស្រីម្នាក់ទៀត បានមកសួរជនរងគ្រោះថា ៖ អ្ហែងមានរើសបានអីឬអត់ ?ជនរងគ្រោះឆ្លើយថា៖ អត់បានរើសអីទេ ។

ពេលនោះជនរងគ្រោះឃើញមនុស្សស្រីដែលជួបលើកដំបូងជាអ្នករើសកាបូប ហើយបាននិយាយប្រាប់ជនរងគ្រោះថា ៖កុំមាត់ចាំយើងចែកគ្នា ដោយសន្យាចែកឲ្យមួយតម្លឹងកន្លះ ពេលនោះមនុស្សស្រីដែលជនរងគ្រោះជួបទី២បានប្រាប់ជនរងគ្រោះថា ៖ ឲ្យដើរចេញទៅក្រៅទាំងអស់គ្នាពីព្រោះលាភយើងមកដល់ហើយ។ ជនសង្ស័យបានលួងលោមជនរងគ្រោះឲ្យមកចែកមាសគ្នានៅចំណុចរោងម៉ាស៊ីនកិនស្រូវចាស់ ស្ថិតនៅភូមិស្ទឹង២ ឃុំសំរោងធំ ពេលនោះជនរងគ្រោះបានចេញពីផ្សារ និងបានយកកូនតូចទៅផ្ញើ​បងស្រី រួចដើរជាមួយជនសង្ស័យជាមនុស្សស្រីទាំង២នាក់ សំដៅទៅរោងម៉ាស៊ីនកិនស្រូវចាស់។ ពេលទៅដល់ស្រាប់តែមានម៉ូតូហុងដា២គ្រឿងបានមកឌុបជនរងគ្រោះនិងមនុស្សស្រីទាំងពីរនាក់(ជនសង្ស័យ)សំដៅ ទៅភ្នំពេញ ពេលជិះដល់មុខវត្តគង្គាស្ទឹង ម៉ូតូក៏ឈប់ ហើយអ្នកទាំងបី(ជនរងគ្រោះនិងជនសង្ស័យជាមនុស្សស្រីទាំងពីរនាក់) ចុះទៅនិយាយគ្នាដោយជនសង្ស័យជាស្ត្រីទី១បានហុចដុំមាសឲ្យជនរងគ្រោះយកទៅលក់ តែជនរងគ្រោះប្រកែកថាមិនយកទេ ហើយថា បងឯងយកទៅលក់ទៅ ។ ជនសង្ស័យឮ ដូចនេះក៏និយាយលួងលោមឲ្យជនរងគ្រោះទុកចិត្តនិងព្រមដោះគ្រឿងអល័ង្កាប្រគល់ទៅឲ្យពួកគេហើយពួកគេបានប្រគល់ស្បោងថា ជាដុំមាស មកឲ្យជនរងគ្រោះយកទៅលក់ជាមួយជនសង្ស័យជាស្ត្រីម្នាក់ទៀត រួចក៏នាំគ្នាដើរឡើងមកថ្នល់ជាតិវិញ ។

ពេលមកដល់ថ្នល់ជាតិមានម៉ូតូ១គ្រឿងទៀតបានមកឌុបស្ត្រីទាំងពីរនាក់ ជាជនសង្ស័យឡើងទៅភ្នំពេញបាត់ទៅ ។
ចំណែកជនរងគ្រោះបានឡើងជិះម៉ូតូរបស់ឈ្មោះដួង សុខន ដែលជាបក្ខពួកមនុស្សស្រីទាំងពីរនាក់នោះ និងបានប្រាប់ឲ្យជិះកៀកជា
មួយម៉ូតូដែលជនសង្ស័យជាស្ត្រីជិះ តែឈ្មោះ ដួង សុខន ថា ៖ខ្ញុំមិនអាចជិះកៀកបានទេ ពីព្រោះខ្ញុំមិនមែនម៉ូតូឌុបទេ ខ្ញុំមកនិមន្តលោកទេ ឮដូចនេះជនរងគ្រោះសង្ស័យក៏បានស្រែកឆោឡោថា ៖ ចោរៗ ពេលនោះបានអ្នក ស្រុកចេញមកជួយចាប់ឃាត់ខ្លួនរួចរាយការណ៍ជូនសមត្ថកិច្ចប៉ុស្តិ៍នគរបាលរដ្ឋបាលសំរោងធំ រួចកម្លាំងប៉ុស្តិ៍ក៏បានចុះទៅដល់កន្លែងកើតហេតុ នាំខ្លួនជនសង្ស័យទាំងពីរ មកប៉ុស្តិ៍ដើម្បីសួរនាំ ។
នៅចំពោះមុខសមត្ថកិច្ចជនសង្ស័យបានឆ្លើយសារភាពថា៖ ពួកខ្លួនពិតជាធ្វើសកម្មភាពដូចខាងលើប្រាកដមែន ។

ជនសង្ស័យបានបញ្ជូនមកអធិការដ្ឋាននគរបាលស្រុកដើម្បីបន្តចាត់ការតាមនីតិវិធី៕

មតិយោបល់