បន្ទាយមានជ័យៈ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា ក្មេងប្រុស២នាក់ បានរងរបួសធ្ងន់ ម្នាក់បាកជើងនិងដៃ ម្នាក់ទៀតបែកក្បាល ត្រង់ចំណុចខាងជើងផ្លូវអក្សរT ចម្ងាយ១៥០ម៉ែត្រ ស្ថិតនៅភូមិត្រាង ឃុំភ្នំដី ស្រុកភ្នំស្រុក ខេត្ដបន្ទាយមានជ័យ ។
ហេតុការណ៍នេះកើតឡើងនៅវេលាម៉ោង៦និង៣០នាទីល្ងាច កាលពីទី៨ ខែមករា ឆ្នាំ២០១៩ ។
យោងតាមសមត្ថកិច្ចមូលដ្ឋាន បានប្រាប់ឲ្យដឹងថា ៖ នៅវេលាម៉ោងកើតហេតុបានឃើញក្មេងប្រុស២នាក់ ជិះម៉ូតូជាមួយគ្នាRSX ស៊េរី២០១៥ ពណ៌ក្រហមខ្មៅ ពាក់ស្លាកលេខ បន្ទាយមានជ័យ 1M-6583 ។ អ្នកបើកបរម៉ូតូ ឈ្មោះ ឡុញ អ៊ីស៊ិញ ភេទប្រុស អាយុ១៤ឆ្នាំ នៅរស់ភូមិថ្នល់ដាច់ ឃុំភ្នំដី ស្រុកភ្នំស្រុក ខេត្ដបន្ទាយមានជ័យ និងអ្នករួមដំណើរដោយឈ្មោះ ព្រាន ចាន់សួន ប្រុសអាយុ១២ឆ្នាំ រស់នៅភូមិឃុំជាមួយ បានធ្វើដំណើរក្នុងទិសដៅពីខាងត្បូងទៅជើង។ លុះមកដល់ចំណុចកើតហេតុស្រាប់តែមានរថយន្តម៉ាក Hyandai ពណ៌ក្រហម ជារថយន្ដក្រុមហ៊ុនដឹកស្រាបៀរអង្គរ ចង្កូតស្ដាំ ពាក់ស្លាកលេខ BMC 0017 បើកច្រាសទិសគ្នា បើកបរដោយឈ្មោះ សាន ម៉ាន់ទី ភេទប្រុស អាយុ ២២ឆ្នាំ រស់នៅភូមិរោងគុន ឃុំឬស្សីក្រោក ស្រុកមង្គលបូរី បានបុកម៉ូតូពេញទំហឹង បណ្តាលឲ្យឈ្មោះ ឡុញ អ៊ីស៊ិញ បាក់ជើងខាងឆ្វេង និងបាក់ដៃខាងឆ្វេង ។ រីឯអ្នករួមដំណើរឈ្មោះ ព្រាន ចាន់សួន រងរបួសបែកក្បាលនិងរបួសខ្នងជើងខាងឆ្វេង។
សមត្ថកិច្ចបានបញ្ជាក់ថា ៖ ក្រោយពីកើតហេតុជនរងគ្រោះទាំង២នាក់ត្រូវបានបញ្ជូនទៅមន្ទីរពេទ្យគុន្ធបុប្ផាខេត្ដសៀមរាបដើម្បីធ្វើការសង្គ្រោះ ។
បច្ចុប្បន្ន រថយន្តបង្ក និងម៉ូតូជនរងគ្រោះត្រូវបានយកទៅរក្សាទុក នៅអធិការរដ្ឋាននគរបាលស្រុក ដើម្បីរង់ចាំដោះស្រាយដោយសន្តិវិធីច្បាប់ ៕
មតិយោបល់