បាត់ដំបង: គ្រឿងអលង្ការដ៏ច្រើនសន្ធឹកសន្ធាប់ ដែលមានតម្លៃរាប់ពាន់ដុល្លារ ត្រូវបានក្រុមជនមិនស្គាល់មុខ ធ្វើសកម្មភាពគាស់ទ្វារ គាស់បង្អួច ទាំងព្រឹក ចូលទៅប្រមូលគ្មានសល់ ខណ:ដែលម្ចាស់ផ្ទះនាំគ្នាបិទទ្វារចាក់សោ ហើយចេញទៅរកស៊ី និងទៅធ្វើការនៅខាងក្រៅស្ងាត់អស់។
របាយការណ៍របស់នគរបាលបានឲ្យដឹងថា ករណីអំពើលួចនេះ បានកើតឡើងនៅចន្លោះពីម៉ោង៦:៣០នាទី ដល់ម៉ោង១០:៣០នាទីព្រឹក ថ្ងៃទី៥ ខែកក្កដា ឆ្នាំ២០១៦ ស្ថិតនៅចំណុចក្រុមទី១៥ ភូមិអន្លង់វិល ឃុំអន្លង់វិល ស្រុកសង្កែ ខេត្តបាត់ដំបង ដែលម្ចាស់ផ្ទះនោះមានឈ្មោះ ស៊ុយ សុវណ្ណា ភេទប្រុស អាយុ៦៥ឆ្នាំ រស់នៅចំណុចកើតហេតុខាងលើ។
តាមសម្ដីរបស់ម្ចាស់ផ្ទះ បាននិយាយថា នៅព្រឹកថ្ងៃកើតហេតុគឺខ្លួននិងក្មេងៗ បានចេញទៅលក់ដូរនៅឯផ្សារសង្កែ ចំណែកកូនស្រីទាំងពីរនាក់ក៏បានចេញទៅធ្វើការអស់ហើយដែរ ដោយទ្វារផ្ទះជាទម្លាប់គឺត្រូវចាក់សោចោល។ លុះនៅពេលត្រឡប់មកពីលក់ដូរវិញទើបមានការភ្ញាក់ផ្អើល ដោយសារតែឃើញទ្វារផ្ទះ និងចម្រឹងដែកបង្អួច ត្រូវបានជនមិនស្គាល់មុខគាស់ឡើងរបើកខ្ទេចខ្ទីអស់ ព្រមទាំងបានចូលទៅក្នុងបន្ទប់ ប្រមូលយកគ្រឿងអលង្ការអស់គ្មានសល់ទាំងរបស់ខ្លួន ក៏ដូចជារបស់កូនស្រីទាំងពីរនាក់ផងដែរ។
នៅចំពោះមុខសមត្ថកិច្ច ម្ចាស់ផ្ទះបានរៀបរាប់នូវប្រភេទគ្រឿងអលង្ការ ដែលបានបាត់បង់ និងដែលជារបស់ផ្ទាល់ខ្លួនរួមមាន ចិញ្ចៀនប្លាទីនដាំពេជ្រចំនួន២វង់ ស្មើនឹង១៥០០ដុល្លារ ចិញ្ចៀនប្លាទីន១វង់ ស្មើ១៥០ដុល្លារ ខ្សែ .ក ប្លាទីនដាំត្បូង១ខ្សែ ស្មើ៣០០ដុល្លារ ក្រវិលប្លាទីន១គូ ស្មើ៥០ដុល្លារ។
ដោយឡែករបស់កូនស្រីប្អូនឈ្មោះ ស៊ុយ ណារ៉ូន អាយុ៣១ឆ្នាំ គឺបានបាត់បង់ ចិញ្ចៀនប្លាទីនដាំពេជ្រចំនួន២វង់ ស្មើ២០០០ដុល្លារ ខ្សែ កប្លាទីន១ខ្សែមិនចាំតម្លៃ ខ្សែ ក មាស១ខ្សែ ស្មើ៤៥០ដុល្លារ ចិញ្ចៀនមាស១វង់ ស្មើ២២៥ដុល្លារ ចិញ្ចៀនប្លាទីន៤វង់ ស្មើនឹង៨០ដុល្លារ ខ្សែដៃប្លាទីន១ខ្សែ ស្មើ២៥០ដុល្លារ កងដៃប្លាទីន១កងមិនចាំតម្លៃ។ ចំណែករបស់កូនស្រីបងឈ្មោះ ស៊ុយ ផានិត អាយុ៣៨ឆ្នាំ ដែលកូនស្រីទាំងពីរនាក់រស់នៅជុំគ្នាជាមួយនឹងឪពុក គឺបានបាត់បង់ដូចជា ខ្សែដៃប្លាទីណដាំពេជ្រ១ខ្សែ ស្មើ២០០០ដុល្លារ និងក្រវិលប្លាទីន១គូ ស្មើ៣០ដុល្លារ បើសរុបនៃការបាត់បង់គ្រឿងអលង្ការនៅក្នុងអំពើលួចនេះអស់ប្រមាណជិត៨ ពាន់ដុល្លារ ដោយក្រុមចោរប្រមូល ហើយគេចខ្លួនបានដោយសុវត្ថិភាព។
បច្ចុប្បន្នកម្លាំងជំនាញនៃអធិការដ្ឋាននគរបាលស្រុកសង្កែ ដោយបានសហការជាមួយនឹងកម្លាំងប៉ុស្តិ៍ បាននិងកំពុងធ្វើការ ស្រាវជ្រាវយ៉ាងយកចិត្តទុកដាក់ ដើម្បីតាមរកមុខសញ្ញា ដែលបានប្រើប្រាស់ចបកាប់ធ្វើជាឧបករណ៍សម្រាប់គាស់ទ្វារ បង្អួចចូលទៅប្រមូលយកទ្រព្យសម្បត្តិទាំងអស់នេះ៕
មតិយោបល់