ភ្នំពេញ: ម៉ូតូកងបីឥណ្ឌាមួយគ្រឿង បានបើកជ្រុលទៅបុក ជាមួយរថយន្តស្តារិច ក្នុងទិសដៅបញ្ច្រាសគ្នា បណ្តាលឲ្យរួញកៀប ជាប់អ្នកបើកបរនៅក្នុងកង់បី យកមិនចេញ ត្រូវបានបងប្អូនប្រជាពលរដ្ឋតេហៅ ដើម្បីស្នើសុំឲ្យក្រុមសង្រ្គោះរបស់អង្គភាព៧១១ មកជួយវះទាញយកជនរងគ្រោះចេញ រួចដឹកបញ្ជូនទៅសង្រ្គោះនៅមន្ទីរពេទ្យ ។

ហេតុការណ៍នេះ កើតទ្បើងកាលពីវេលាម៉ោង៥ និង៣០នាទីព្រឹក ថ្ងៃទី១២ ខែមករា ឆ្នាំ២០១៩ ស្ថិតនៅលើកំណាត់ផ្លូវសហព័ន្ធរុស្សី អាកាសយាន្តដ្ឋានអន្តរជាតិភ្នំពេញ ស្ថិតនៅភូមិក្បាលដំរី១ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ ។

ភាគីខាងម៉ូតូកង់បីឥណ្ឌា ពណ៌លឿង ពាក់ស្លាកលេខ ភ្នំពេញ1HF-0953 បើកបរដោយ ឈ្មោះ ឆាយ ថង ភេទប្រុស អាយុ៤៥ឆ្នាំ មុខរបរ រត់ម៉ូតូកង់បី ស្នាក់នៅភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ រងរបួសបាក់ជើងឆ្វេង ។ ចំណែកភាគីរថយន្តស្តារិច ពណ៌ទឹកប្រាក់ ពាក់ស្លាកលេខ ភ្នំពេញ 2AU-4017 បើកបរដោយបុរសម្នាក់មិនស្គាល់ឈ្មោះ ។

តាមប្រភពនៅកន្លែងកើតហេតុ បានឲ្យដឹងថា មុនកើតហេតុ ម៉ូតូកង់បី បើកតាមបណ្តោយផ្លូវសហព័ន្ធរុស្សី ពីកើតទៅលិច លុះដល់ចំណុចខាងលើ បានវ៉ាជែងរថយន្តបណ្តាលឲ្យជ្រុល ចូលទៅគន្លងផ្លូវ ម្ខាងទៀត ត្រូវបានរថយន្តស្តារិច បើកពីលិចទៅកើត ជ្រុលបុកចំពីមុខ បណ្តាលឲ្យរមួលរួញកៀបជាប់អ្នកបើកបរកង់បី ទាញយកមិនចេញ ត្រូវបានបងប្អូនប្រជាពលរដ្ឋ ហៅរកក្រុមសង្រ្គោះរបស់អង្គភាព៧១១ កងពលតូចលេខ៧០ ទៅជួយវះ កាត់ កង់បី ទាញយកជនរងគ្រោះ ដឹកបញ្ជូនទៅមន្ទីរពេទ្យព្រះកុសុម: ។

ក្រោយកើតហេតុសម្ភារ: រថយន្ត និងម៉ូតូកង់បី ត្រូវបានសមត្ថកិច្ចជំនាញ ចុះទៅពិនិត្យជាក់ស្តែង វាស់វែងរួច យកទៅរក្សាទុកនៅការិយាល័យចរាចរណ៍ជើងគោក ស្នងការរាជធានីភ្នំពេញ រងចាំដោះស្រាយពេលក្រោយ៕