Post News Media ព័ត៌មានជាតិ ​ឃាត់ខ្លួន​ក្...

​ឃាត់ខ្លួន​ក្រុមចោរ​​និង​អ្នកទទួលផល​ចោរកម្ម​៣​នាក់ ពាក់ព័ន្ធករណី​លួច​ភ្នែក​កាមេរ៉ា​សុវត្ថិភាព!

ស្វាយ​រៀង: យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា ជនសង្ស័យ​៣​នាក់​ ត្រូវ​បាន​កម្លាំង​ជំនាញ​ព្រហ្មទណ្ឌ​ខេត្ត​ស្វាយរៀង​ ស្រាវជ្រាវ​ឃាត់ខ្លួន​ បន្ទាប់​ពី​ពួក​គេ​បាន​លួច​ភ្នែក​កាមេរ៉ា​សុវត្ថិភាព​យក​ទៅ​លក់​ ។​

​តាម​របាយការណ៍​របស់​ កម្លាំង​ជំនាញ​នគរបាល​ក្រុង​ស្វាយ​រៀង​ ការ​ឃាត់ខ្លួន​ជនសង្ស័យ​ខាងលើ​នេះ​ បាន​ធ្វើ​ឡើង​កាលពី​ថ្ងៃ​ទី​១១​ ខែមករា​ ឆ្នាំ​២០១៩​ វេលា​ម៉ោង​៨​ព្រឹក​ មានឈ្មោះ​ សុខ​ ចាន់​ហ៊ួ​ ភេទ​ប្រុស​ អាយុ​ ៤៩​ឆ្នាំ​ មុខរបរ​លក់​ថ្នាំពេទ្យ​ បាន​រាយការណ៍​មក​សមត្ថកិច្ច​ថា​ មាន​ករណី​ចោរលួច​ភ្នែក​កាមេរ៉ា​សុវត្ថិភាព​នៅផ្ទះ​របស់​ខ្លួន​ ស្ថិត​នៅ​ភូមិ​ស្វាយ​រៀង​ សង្កាត់​ស្វាយ​រៀង​ ក្រុង​ស្វាយ​រៀង​ ខេត្តស្វាយរៀង​ ។​

ក្រោយ​ពី​ទទួល​បាន​ព័ត៌មាន​នេះ​ភ្លាម​កម្លាំង​ជំនាញ​អធិការដ្ឋាន​នគរបាល​ក្រុង​ស្វាយ​រៀង​ សហការ​ជាមួយ​កម្លាំង​ចុះ​ពង្រឹង​ក្រុង​ស្វាយ​រៀង​ និង​ប៉ុស្តិ៍​រដ្ឋបាល​សង្កាត់​ស្វាយ​រៀង​ បាន​ចុះ​ទៅ​ដល់​កន្លែង​កើតហេតុ​ធ្វើការ​ស្រាវជ្រាវ​ និង​ឆែក​កាមេរ៉ា​សុវត្ថិភាព​ជុំវិញ​កន្លែង​កើតហេតុ​ ដើម្បី​ធ្វើការ​កំណត់​មុខសញ្ញា​ ។​ លុះដល់​ម៉ោង​ ១១​ថ្ងៃត្រង់​ សមត្ថកិច្ច​បាន​នាំ​ខ្លួន​ជនសង្ស័យ​ឈ្មោះ​ ណេ​ប​ បូ​រ៉ា​ ភេទ​ប្រុស​ អាយុ​៤០​ឆ្ន​មុខរបរ​ មិន​ពិតប្រាកដ​ មាន​ទីលំនៅ​ភូមិ​ស្វាយ​រៀង​ សង្កាត់​ស្វាយ​រៀង​ ក្រុង​ស្វាយ​រៀង​ ខេត្តស្វាយរៀង​ មក​ធ្វើការ​សាកសួរ​នៅ​អធិការដ្ឋាន​នគរបាល​ក្រុង​ ស្វាយ​រៀង​។​

នៅ​ចំពោះ​មុខ​សមត្ថកិច្ច​ជនសង្ស័យ​បាន​ឆ្លើយ​សារភាព​ថា​ ខ្លួន​ពិតជា​បាន​លួច​ភ្នែក​កាមេរ៉ា​សុវត្ថិភាព​ចំនួន​០៣​គ្រឿង​ របស់​ជន​រង​គ្រោះ​ខាងលើ​ប្រាកដ​មែន​ ហើយ​ខ្លួន​បាន​យក​ភ្នែក​កាមេរ៉ា​សុវត្ថិភាព​ ទៅ​ឲ្យឈ្មោះ​ ញឹ​ម​ អេ​ង​ ភេទ​ប្រុស​ អាយុ​៣៧​ឆ្នាំ​ មុខរបរ​កម្មករ​ មាន​ទីលំនៅ​ភូមិ​រោង​បន្លែ​ សង្កាត់​ស្វាយ​រៀង​ ក្រុង​ស្វាយ​រៀង​ យក​ទៅ​លក់​ ប៉ុន្តែ​ឈ្មោះ​នេះ​ពុំ​បាន​ទទួលយក​ទៅ​លក់​ទេ​ រួចខ្លួន​បាន​យក​ភ្នែក​កាមេរ៉ា​សុវត្ថិភាព​ទៅ​ចោល​ក្នុង​ទឹក​ ហើយ​ខ្លួន​ក៏​ចេញ​មក​ផ្សារ​តែ​ម្ដង​ ។​ លុះ​ក្រោយ​ពេល​ដែល​ជនសង្ស័យ​ ឈ្មោះ​ ណេ​ប​ បូ​រ៉ា​ ចេញ​ផុត​ ក៏​ស្រាប់តែ​ឈ្មោះ​ ញឹ​ម​ អេ​ង​ បាន​ចុះ​ទៅ​ក្នុង​ទឹក​រាវរក​ភ្នែក​កាមេរ៉ា​សុវត្ថិភាព​ បាន​ចំនួន​២​គ្រឿង​ ហើយ​យក​ទៅ​លក់​ឲ្យឈ្មោះ​ សួ​ស​ រតនា​ ហៅ​ខ្លី​ អាយុ​២៧​ឆ្នាំ​ មុខរបរ​គ្រូបង្រៀន​ មាន​ទីលំនៅ​ភូមិ​តារាង​បាល់​ សង្កាត់​គយ​ត្របែក​ ក្រុង​ស្វាយ​រៀង​ ក្នុង​តម្លៃ​ ០១​គ្រឿង​ ៣០,០០០​រៀល​ ។​
​បច្ចុប្បន្ន​ជនសង្ស័យ​ទាំង​៣​នាក់​ខាងលើ​ ត្រូវ​បាន​សមត្ថកិច្ច​ឃាត់ខ្លួន​នៅ​អធិការដ្ឋាន​នគរបាល​ក្រុង​ស្វាយ​រៀង​ ដើម្បី​កសាង​សំណុំរឿង​ចាត់ការ​តាម​ច្បាប់​ ៕

Loading...