ភ្នំពេញ: មានការភ្ញាក់ផ្អើលខ្លាំងមួយបានកើតឡើង ខណ:ដែលនារីម្នាក់ រួមនឹងសាច់ញាតិ៥នាក់ទៀតត្រូវបានបុគ្គលិក និងគ្រូពេទ្យ ដែលបម្រើការនៅក្នុងមន្ទីរពេទ្យអន្តរជាតិវ៉ិចតូរៀ ចាក់សោទ្វារបង្ខាំងទុក្ខ ដោយសារតែគ្មានលុយបង់ថ្លៃព្យាបាលឲ្យគ្រប់ចំនួន ទាំងដែលខាងមន្ទីរពេទ្យបានបង្ហោះFacebook ឃោសនាសេវាកម្ម ពិគ្រោះ និងពិនិត្យជំងឺដោយឥតគិតថ្លៃ តែក្រោយមកស្រាប់តែថ្លៃព្យាបាលជាបន្តបន្ទាប់ និងនិយាយបំភ័យពីអាការ:ជំងឺដើម្បីឲ្យអ្នកជំងឺធ្វើការវះកាត់ ទើបពួកគាត់រាយការណ៍ជូនសមត្ថកិច្ចដើម្បីជួយដោះស្រាយតែម្តង។
ករណីនេះបង្កការភ្ញាក់ផ្អើលកាលពីវេលាម៉ោង៧និង៣០នាទីយប់ ថ្ងៃទី១៣ ខែមករា ឆ្នាំ២០១៩ ក្នុងមន្ទីរពេទ្យអន្តរជាតិ វ៉ិច តូរៀ ជាប់ស្តុបផ្សារមាន់អាំង សង្កាត់បឹងកក់ទី២ ខណ្ឌទួលគោក រាជធានីភ្នំពេញ។
ស្ត្រីដែលទៅសេវាកម្មខាងលើមានឈ្មោះ មួយ ហៀង អាយុ១៩ឆ្នាំ ជាបុគ្គលិកបម្រើការនៅក្នុងហាងផឹកស៊ីមួយកន្លែង។
ប្រភពពីស្ត្រីជាម្តាយបានឲ្យដឹងថា កូនគាត់មានអាការ:ហើមទ្វារមាស ហើយកាលពីថ្ងៃទី១១ ខែមករា ឆ្នាំ២០១៩ គាត់និងម្តាយបានមកកាន់មន្ទីរពេទ្យអន្តរជាតិ វ៉ិច តូរៀ ព្រោះឃើញគេផ្សាយតាមFacebook ថាពិគ្រោះ និងពិនិត្យជំងឺដោយឥតគិតថ្លៃ លុះពិនិត្យរួចគ្រូពេទ្យបានប្រាប់ថា កូនគាត់មានជំងឺគីសនៅដៃស្បូនដំណាក់កាលចុងក្រោយ តម្រូវឲ្យវះកាត់បើមិនដូច្នេះទេអាចស្លាប់ គាត់ក៏រារែកចុះត្រឡប់ផ្ទះវិញសិន តែគ្រូពេទ្យទាំងនោះហាមមិនឲ្យមក និងនិយាយបំភ័យឲ្យគាត់វះកាត់ ទើបគាត់ព្រមវះកាត់ក្នុងតម្លៃ២៨០ដុល្លារ ដែលជាតម្លៃថោកបំផុត ហើយក៏វះកាត់ដោយរលូន តែកូនគាត់ស្រាប់តែសន្លប់បាត់ស្មារតីរហូត ទើបគាត់បានសួរគ្រូពេទ្យ គេតបថា សេវាកម្មវះកាត់២៨០ដុល្លារដែលថោកបំផុតនេះគ្មានថ្នាំព្យាបាលទេ ហើយក៏និយាយប្រាប់ថា ឲ្យយកសេវាកម្មវះកាត់២០០០ដុល្លារទៅទើបអាចជា បើមិនដូច្នេះទេអាចស្លាប់ ឬក៏បង់លុយ៦០០ដុល្លារសិនក៏បាន ចាំបង់តាមក្រោយ ទើបគាត់ខ្ចីលុយគេមកបង់៦០០ដុល្លារសិន ទើបខាងគ្រូពេទ្យយកថ្នាំមកឲ្យកូនគាត់លេបនិងដឹងខ្លួនឡើងវិញ។ ចំណែកថ្លៃបន្ទប់១យប់៥០០ដុល្លារ គាត់អស់លទ្ធភាពក៏សុំចេញមកសម្រាកនៅផ្ទះ តែដោយសារបង់លុយមិនទាន់គ្រប់ខាងពេទ្យមិនឲ្យចេញនោះទេ រហូតចាប់សោរបង្ខំទុកដូចអ្នកទោសតែម្តង ។
ក្រោយមកស្ត្រីជាម្តាយបានទៅប្តឹងសមត្ថកិច្ចឲ្យជួយដោះស្រាយ ទើបខាងពេទ្យព្រមឲ្យពួកគាត់ត្រឡប់មកវិញ ដោយមិនទាមទារលុយដែលនៅសល់ទៀតទេ៕
មតិយោបល់