ព័ត៌មានជាតិ

​តេណាត់មិនមកជួប! ប្តីជះទឹកអាស៊ីត រងរបួសធ្ងន់ស្រាល៣នាក់ រួចរត់គេចខ្លួនបាត់

កណ្តាល: កាលពីវេលាម៉ោង៧យប់ ថ្ងៃទី១៤​ ខែមករា ឆ្នាំ២០១៩ មានករណីហិង្សាដោយចេតនា​( ជះទឹកអាស៊ីត) នៅភូមិដុល ឃុំសន្លុង ស្រុកខ្សាច់កណ្តាល ខេត្តកណ្តាល។

ជនរងគ្រោះ៣នាក់ ទី១​ឈ្មោះ រ៉ា ស្រីនិច្ច ភេទស្រី អាយុ​១៩​ឆ្នាំ មុខរបរ កសិករ មានទីលំនៅភូមិឃុំកើតហេតុ (របួសស្រាល)​ជាប្រពន្ធ។ ទី២.ឈ្មោះ ម៉ៃ ស្រីឡា ភេទស្រី អាយុ២១​ឆ្នាំ មុខរបរ កសិករ មានទីលំនៅភូមិឃុំកើតហេតុ​(របួសស្រាល)។ និងទី៣​ឈ្មោះ ណាន ឈាវភេទ ភេទប្រុស អាយុ ១ឆ្នាំ៦ខែ​ នៅក្នុងបន្ទុក​(ជាកូន) របួសធ្ងន់បញ្ជូនទៅមន្ទីរពេទ្យគន្ធបុប្ផា។

ជនសង្ស័យ​ឈ្មោះ អ៊ុក កុម្ភ: ភេទប្រុស អាយុ​២២​ឆ្នាំ មុខរបរ កម្មករតម្លើងរោងការនៅ​ភ្នំពេញ មានទីលំនៅភូមិ-ឃុំ-ស្រុក មិនស្គាល់ ខេត្តកំពត​(ត្រូវជាប្តី) គេចខ្លួន។

នៅមុនពេលកើតហេតុ កន្លងមកឈ្មោះ អ៊ុក កុម្ភ: តែងតែប្រើប្រាស់អំពើហិង្សាវាយទៅលើប្រពន្ធឈ្មោះ រ៉ា ស្រីនិច្ច ជាញឹកញាប់ពេលទៅធ្វើការងារ និងស្នាក់នៅឯភ្នំពេញ ដោយទ្រាំលែងបានឈ្មោះ រ៉ា ស្រីនិច្ច បានត្រឡប់មករស់នៅផ្ទះខ្លួនវិញ ឯភូមិដុល ឃុំសន្លុង។ ក្រោយមកឈ្មោះអ៊ុក កុម្ភ: តែងតែមករករឿង និងធ្លាប់និយាយគំរាមឈ្មោះ រ៉ា ស្រីនិច្ច ថានិងជះទឹកអាស៊ីតដាក់នៅថ្ងៃណាមួយ ។ លុះមកដល់ថ្ងៃទី១៤.០១.២០១៩ ឈ្មោះ អ៊ុក កុម្ភ: បានតេទូរសព្ទ័មកឈ្មោះ រ៉ា ស្រីនិច្ច ជាច្រើនដងឲ្យទៅជួបនៅតំបន់7NG ស្ថិតនៅភូមិព្រៃចាស់ឃុំវិហារសួគ៌ ប៉ុន្តែឈ្មោះរ៉ា ស្រីនិច្ច មិនព្រមទៅជួប ហើយឈ្មោះ អ៊ុក កុម្ភ:បាននិយាយថា បើមិនទៅជួបប្រាកដជាមានរឿងដល់ម៉ោង ១៩:០០ នាទី ថ្ងៃដដែល ឈ្មោះ រ៉ា ស្រីនិច្ច ឈ្មោះ ម៉ៃ ស្រីឡា និង ឈ្មោះ ណាន ឈាវ បានដើរទៅទិញម្ហូបនៅខាងកើតផ្ទះ ដោយឈ្មោះម៉ៃ ស្រីឡា ជាអ្នកពរឈ្មោះ ណាន ឈាវ ពេលទិញរួចក៏ដើរត្រឡប់មកផ្ទះវិញ។ ពេលកំពុងដើរត្រឡប់មកផ្ទះវិញនោះ ឈ្មោះ អ៊ុក កុម្ភ: បានជិះម៉ូតូមួយគ្រឿងម៉ាកហុងដា C125 ពណ៌ខ្មៅ ស៊េរីឆ្នាំ ២០០៤ មិនចាំស្លាកលេខ ពាក់អាវពណ៌ទឹកប៊ិច ជិះពីលិចទៅកើត លុះមកដល់ក៏បានយកទឹកអាស៊ីតជះទៅលើអ្នកទាំង៣ បណ្តាលឲ្យត្រូវមុខឈ្មោះ ណាន ឈាវ រងរបួសធ្ងន់ បញ្ជូនទៅមន្ទីរពេទ្យគន្ធបុប្ផា ឯឈ្មោះ រ៉ា ស្រីនិច្ច និងឈ្មោះ ម៉ៃ ស្រីឡា រងរបួសស្រាល ភ្លាមនោះឈ្មោះ អ៊ុក កុម្ភ: បានជិះម៉ូតូរត់គេចខ្លួនបាត់។

​ករណីនេះកម្លាំងបានចុះកសាងសំណុំរឿងនិងស្វែងរកចាប់ខ្លួនជនសង្ស័យចាត់ការតាមនីតិវិធី៕

មតិយោបល់