Post News Media ព័ត៌មានជាតិ ឃាត់ខ្លួន​ព្រ...

ឃាត់ខ្លួន​ព្រះសង្ឃ​ខ្មែរ២អង្គក្នុងពិធី​ជ័យជម្នះ៧មករាក្រុងប៉ោយប៉ែត និងសង្ឃ​ថៃ​១​អង្គ​នៅហាង​កាហ្វេ​អា​រ៉ាប់​ ប៊ី​ធា​ ដែលសុទ្ធតែជាសង្ឃក្លែងក្លាយ

បន្ទាយមានជ័យ: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា​ ព្រះសង្ឃ​ជនជាតិ​ខ្មែរ​ និង​ជនជាតិ​ថៃ​៣​អង្គ​ រង​ការ​ចោទប្រកាន់​ក្រង​ស្បង់​ជីវរ​ក្លែង​ ចូល​លេងល្បែង​កាស៊ីណូ​ និង​ដើរ​បិណ្ឌបាត​ក្នុង​ពិធី​រាប់​បាត​ ត្រូវ​បាន​រង​ការ​ចាប់​ផ្សឹក​ និង​ឃាត់ខ្លួន​ក្នុង​ករណី​២​ផ្សេង​គ្នា​ នៅ​ក្រុង​ប៉ោយ​ប៉ែ​ត​ ។​ ព្រះសង្ឃ​ទាំង​៣​អង្គ​មាន​ជនជាតិ​ខ្មែរ​២​នាក់​ និង​ជនជាតិ​ថៃ​១​នាក់​ ។​

​ករណី​ទី​១,​បើ​យោង​តាម​ប្រភព​ព័ត៌មាន​ ពី​កម្លាំង​គ​របាល​ក្រុង​ប៉ោយ​ប៉ែ​ត​ បាន​ប្រាប់​ថា​ កាលពី​ព្រឹក​ថ្ងៃ​ទី​១៥​ ខែមករា​ ឆ្នាំ​២០១៩​ នៅ​ចំណុច​បុរី​ សាន​ ស៊ា​ន​ហូ​ អាជ្ញា​ក្រុង​ប៉ោយ​ប៉ែ​ត​ ខេត្តបន្ទាយមានជ័យ​ បាន​រៀប​ពិធី​រំលឹក​ខួប​អនុស្សាវរីយ៍​លើក​ទី​៤០​ ថ្ងៃ​ជម្នះ​ ៧​មក​រា​ ១៩៧៩​ និង​៧​មក​រា​ ២០១៩​ ក្នុង​ពិធី​នោះ​ក៏​បាន​ ធ្វើ​ពិធីបង្សកូល​ រាប់​បាត​រំលឹក​ឧទ្ទិស​វិញ្ញាណក្ខន្ធ​ជន​រង​គ្រោះ​ ស្លាប់​ ក្នុង​របប​ ប៉ុ​ល​ពត​ ដែល​និមន្ត​ព្រះសង្ឃ​៤១៦​អង្គ​ ។​ ស្រាប់តែ​នៅ​ពេល​នោះ​ឃើញ​មាន​ព្រះសង្ឃ​៣​អង្គ​ គ្មាន​បណ្ណ​ចូលរួម​ក្នុង​កម្ម​ពិធី​ សមត្ថកិច្ច​ក៏​បាន​សួរនាំ​ ហើយ​ក៏​បញ្ជូន​ទៅ​កាន់​ការិយាល័យ​ធម្មការ​ និង​សាសនា​ ក្រុង​ប៉ោយ​ប៉ែ​ត​ រក​លិខិត​ស្នាម​។​ ក្នុង​ចំណោម​ព្រះសង្ឃ​៣​អង្គ​ មាន​២​អង្គជា​សង្ឃ​ក្លែងក្លាយ​គ្មាន​លិខិត​ស្នាម​អ្វី​នោះ​ទេ​ និង​១​អង្គជា​សង្ឃ​ត្រឹមត្រូវ​គង់នៅ​វត្ត​កែវ​មុន្នី​ឧត្តម​ ក្នុងភូមិ​ទំពាំង​ជង​ ឃុំ​កោះ​កែវ​ ស្រុក​បាកាន​ ខេត្តពោធិ៍សាត់​ ។​ ជន​ក្លែង​ជា​សង្ឃ​ទាំង​២​នាក់​ក៏​ត្រូវ​ចាប់​ដោះ​ស្បង់​ជីវរ​ចេញ​ និង​យក​ចាត់ការ​តាម​ផ្លូវច្បាប់​។​ ព្រះសង្ឃ​ទី​១,​ឈ្មោះ​ឌី​ រតនា​ អាយុ​ ២៥​ឆ្នាំ​ នៅ​ក្នុង​ខេត្ត​កំ​ពង​ស្ពឺ​ ។​ ព្រះសង្ឃ​ទី​ ២,​ឈ្មោះ​ ភារ​ម្យ​ អាយុ​ ២០​ឆ្នាំ​ នៅ​ក្នុង​ខេត្តតាកែវ​។​

​បើ​តាម​ចម្លើយ​សារភាព​ជនសង្ស័យ​ក្លែង​ជា​សង្ឃ​ខាងលើ​ ប្រាប់​ថា​ខ្លួន​បាន​ជួល​ជន​ម្នាក់​ឲ្យ​ធ្វើ​ឆាយា​ លិខិត​ស្នាម​ ក្លែងក្លាយ​ តម្លៃ​២០​ម៉ឺន​រៀល​ ហើយ​បាន​ពាក់​ស្បង់​ជីវរ​ ក្លែង​ជា​ព្រះសង្ឃ​ដើរ​បិណ្ឌបាត​រៃ​អង្គាសប្រាក់​តាម​ផ្សារ​ និង​តាម​ផ្ទះ​ ហើយ​ជួល​ផ្ទះសំណាក់​ស្នាក់​នៅ​ ក្នុង​ប៉ោយ​ប៉ែ​ត​ជា​ច្រើន​ថ្ងៃ​មក​ហើយ​ ។​ បន្ទាប់​មក​ដឹង​ថា​អភិបាលក្រុង​ប៉ោយ​ប៉ែ​ត​ ធ្វើ​ពិធីបុណ្យ​រាប់​បាត​ ក៏​លួច​បន្លំ​ចូល​ជាមួយ​ព្រះសង្ឃ​ដទៃ​ទៀត​ ក្រែង​បាន​ថវិកា​ពី​ការ​រាប់​បាត​ ប៉ុន្តែ​នៅ​ពេល​នោះ​ក៏​ត្រូវ​សមត្ថកិច្ច​ចាប់​ឃាត់ខ្លួន​។​

​ករណី​ទី​២,​ នៅ​ក្រុង​ប៉ោយ​ប៉ែ​ត​ ខេត្តបន្ទាយមានជ័យ​ នោះ​ផង​ដែរ​ កាលពី​រសៀល​ថ្ងៃ​ទី​១៣​ ខែមករា​ ឆ្នាំ​២០១៩​ មាន​ប្រជាពលរដ្ឋ​ប្តឹង​រាយការណ៍​ មក​សមត្ថកិច្ច​នគរបាល​ក្រុង​ប៉ោយ​ប៉ែ​ត​មាន​សង្ឃ​ជនជាតិ​ថៃ​១​អង្គ​ និមន្ត​ចូល​លេង​កាស៊ីណូ​ និង​ដើរ​បិណ្ឌបាត​រៃ​អង្គាសប្រាក់​ នៅ​ក្រុង​ប៉ោយ​ប៉ែ​ត​រយ:ពេល​ជិត​១​ស​ប្តា​ហ៍​មក​ហើយ​ ។​ សមត្ថកិច្ច​ក៏​បានឃើញ​សង្ឃ​ជនជាតិ​ថៃ​និមន្ត​បិណ្ឌបាត​នៅ​ចំណុច​ ហាង​កាហ្វេ​អា​រ៉ាប់​ ប៊ី​ធា​ សមត្ថកិច្ច​ក៏​ហៅ​សួរនាំ​ និង​ឆែកឆេរ​ត្រួតពិនិត្យ​ គ្មាន​ឆាយា​លិខិត​ស្នាម​នោះ​ទេ​ ក៏​ដូច​ជា​តាម​ចម្លើយ​សារភាព​គឺ​ សង្ឃ​ជនជាតិ​ថៃ​នោះ​ ជា​សង្ឃ​ក្លែងក្លាយ​កាន់​លិខិតឆ្លងដែន​ និង​ចាប់​បញ្ជូន​ទៅ​វត្ត​បា​លិ​លេ​យ្យ​ ដើម្បី​ឱ្យ​គ្រូ​ចៅអធិការ​វត្ត​បា​លិ​ល្យ័​ និង​គ្រូ​ចៅ​អ​ធិ​វត្ត​ថ្មី​ ចាប់​ដោះ​ស្បង់​ជីវរ​ចាត់ការ​តាម​នីតិ​វី​ធី​របស់​ព្រះសង្ឃ​ ជនជាតិ​ថៃ​មានឈ្មោះ​ ថា​ឈុំ​ ឈើ​យ​សំ​ឆាត​ អាយុ​៤៨​ឆ្នាំ​ រស់នៅ​ក្នុង​ ខេត្ត​ រ៉ូ​យ​ អេ​ត​ ប្រទេស​ថៃ​៕​

Loading...