ភ្នំពេញៈ កាលពីវេលាម៉ោង៨និង៥០នាទីយប់ ថ្ងៃទី១៦ ខែមករា ឆ្នាំ២០១៩ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តកូរ៉េដឹកអីវ៉ាន់មួយគ្រឿងបានបើកប៉ះម៉ូតូ បណ្តាលឲ្យដួល ភា្លមៗនោះរថយន្តមិនបានឈប់នៅដោះស្រាយនោះទេ បានបើករថយន្តព្យាយាមរត់ ត្រូវបានប្រជាពលរដ្ឋដេញឃាត់ ហើយរថយន្តបង្កក៏បានបុកនឹងរថយន្តមួយគ្រឿងទៀត ដែលធ្វើដំណើរពីលិចទៅកើតកាត់ទទឹងផ្លូវ ចំពីចំហៀង បណ្តាលឲ្យរងការខូចខាត ក៏ត្រូវប្រជាពលរដ្ឋឃាត់បានតែម្តង នៅតាមបណ្ដោយផ្លូវ៣៨៨ កែងនឹងផ្លូវ១៩៩ សង្កាត់ទួលស្វាយព្រៃ២ ខណ្ឌចំការមន រាជធានីភ្នំពេញ។
រថយន្ដបង្ក កូរ៉េដឹកអីវ៉ាន់ ពណ៌ស ពាក់ស្លាកលេខ ភ្នំពេញ 2AB-4340 បើកបរដោយឈ្មោះ និត អាយុ២១ឆ្នាំ ស្នាក់នៅភូមិទួលសំបូរ ឃុំដំណាក់រាំង ស្រុកឧដុង្គ ខេត្តកំពង់ស្ពឺ និងអ្នករួមដំណើរដោយបុរសម្នាក់ទៀតជាព្រូមិនស្គាល់អត្តសញ្ញាណ រងរបួសបែកក្បាលហូរឈាមស្រោចពេញខ្លួន ដោយសារប្រជាពលរដ្ឋខឹងនាំគ្នាព្រួតវាយបណ្តាលឲ្យរងរបួស។ ចំណែករថយន្តដែលត្រូវរថយន្តបង្កបុកម៉ាកmazada CX5 ពណ៌ទឹកប៊ិច ពាក់ស្លាកលេខ ភ្នំពេញ 2AD-3166 រងការខូចខាតខ្ទេចមួយកំណាត់មុខទាំងស្រុង។
ក្រោយពេលកើតហេតុ សមត្ថកិច្ចបានចុះទៅដល់កន្លែងកើតហេតុ ធ្វើការវាស់វែង និងបានស្ទូចយករថយន្តទៅរក្សាទុកបណ្តោះអាសន្ននៅស្នងការដ្ធាននគបាលចរាចណ៏ផ្លូវគោករាជធានីភ្នំពេញ រង់ចាំដោះស្រាយគ្នានៅពេលក្រោយជាបន្តទៀត៕
មតិយោបល់