កណ្តាល: នៅថ្ងៃទី១៧ ខែមករា ឆ្នាំ២០១៩ កម្លាំងការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកណ្តាល សហការជាមួយកម្លាំងព្រហ្មទណ្ឌខេត្តកំពង់ធំ ធ្វើការបង្ក្រាបចាប់បានចោរស្រីដៃឆៅដែលប្លន់ស្ត្រីអ្នករាប់លុយ យកទ្រព្យសម្បត្តិរួចសម្លាប់ចោលនៅស្រុកកណ្តាលស្ទឹង ខេត្តកណ្តាល នៅចំណុចភូមិកំពង់សំរោង ឃុំស្រយ៉ូវ ស្រុកស្ទឹងសែន ខេត្តកំពង់ធំ។
ជនសង្ស័យមានឈ្មោះ សុខ ចាន់ថា ភេទស្រី អាយុ៣៩ឆ្នាំ មានទីលំនៅ ភូមិបឹង ឃុំរកា ស្រុកកណ្ដាលស្ទឹង ខេត្តកណ្ដាល។ ស្ត្រីរងគ្រោះឈ្មោះ ឈុន ទូ អាយុ៥៦ឆ្នាំ មុខរបរមេផ្ទះ មានស្រុកកំណើតស្ថិតនៅឃុំស្រែអំបិល ស្រុកបុទុមសាគរ ខេត្តកោះកុង បច្ចុប្បន្នស្នាក់នៅភូមិបឹង ឃុំរកា ស្រុកកណ្ដាលស្ទឹង ខេត្តកណ្ដាល។
គួររំលឹកផងដែរថា កាលពីវេលាម៉ោង ៥ និង១០នាទីល្ងាចថ្ងៃទី១៤ ខែមករា ឆ្នាំ២០១៩ មានករណីឃាតកម្មមួយ នៅចំណុចក្នុងបន្ទប់ផ្ទះជនរងគ្រោះ ភូមិបឹង ឃុំរកា ស្រុកកណ្តាលស្ទឹង ខេត្តកណ្តាល។ សមត្ថកិច្ចបានឲ្យដឹងថា តាមការបំភ្លឺប្ដីរបស់ជនរងគ្រោះ ឈ្មោះ វង្ស សម្បត្តិ អាយុ ៥៤ឆ្នាំ នៅថ្ងៃទី១៤ ខែមករា ឆ្នាំ២០១៩ វេលាម៉ោង០៦ និង០០នាទីព្រឹក គាត់បានទៅធ្វើការ ដោយជនរងគ្រោះជាប្រពន្ធ នៅផ្ទះតែម្នាក់ឯង បន្ទាប់មកនៅវេលាម៉ោង ៥ និង១៥នាទីល្ងាច ប្ដីជនរងគ្រោះបានត្រឡប់មកដល់ផ្ទះ ពេលនោះក៏ឃើញទ្វារខាងមុខបើកចំហរ បានឈប់ម៉ូតូ រួចក៏អូសម៉ូតូចូលទៅក្នុងផ្ទះ ហើយដើរទៅផ្ទះបាយខាងក្រោយ បន្ទាប់មកបានដើរទៅកាត់សក់ តែមិនបានកាត់សក់ទេ ព្រោះជាងជាប់រវល់ រួចប្ដីជនរងគ្រោះ បានដើរត្រឡប់មកផ្ទះវិញ ហើយក៏បានបើកទ្វារបន្ទប់មើលឃើញជនរងគ្រោះដេកដួល ទៅនឹងការ៉ូរួចបានបីត្រកងជនគ្រោះមកក្រៅ ទើបដឹងថាជនរងគ្រោះស្លាប់បាត់ទៅហើយ ក៏រាយការណ៍មកសមត្ថកិច្ច។
សម្ភារបាត់បង់៖
– ប្រាក់ដុល្លារ ៣ម៉ឺនដុល្លារ
– ប្រាក់រៀល ២ លានរៀល
– ខ្សែ.កមាស ២ ខ្សែទម្ងន់២ តម្លឹង
– ចិញ្ចៀនមាស ១ វង់ ៥ជី
– ខ្សែ ដៃមាស១ ខ្សែ ១ជី ៕
មតិយោបល់