ព្រះសីហនុៈ កាលពីវេលាម៉ោង ១ និង១០នាទីទៀបភ្លឺឈានចូលថ្ងៃទី២០ ខែមករា ឆ្នាំ២០១៩ មានករណីគ្រោះថ្នាក់ចរាចរណ៍មួយ រវាងម៉ូតូនិងរថយន្ត បើកក្នុងទិសផ្ទុយគ្នា បណ្ដាលឲ្យរងរបួសបុរស ២នាក់
នៅលើផ្លូវជាតិលេខ៤ ចន្លោះគីឡូម៉ែត្រ ១៧៥-១៧៦ ស្ថិតនៅក្នុងភូមិត្រពាំងមូល ឃុំជើងគោ ស្រុកព្រៃនប់ ខេត្តព្រះសីហនុ។
ម៉ូតូម៉ាក BEAT ពណ៌ស ពាក់ស្លាកលេខភ្នំពេញ 1EQ-8072 បើកបរដោយឈ្មោះ បាន ភេទ ប្រុស អាយុ ២៩ឆ្នាំ មុខរបរ កម្មករសំណង់ ស្នាក់នៅឃុំកែវផុស ស្រុកស្ទឹងហាវ ខេត្តព្រះសីហនុ មានអ្នករួមដំណើរម្នាក់ឈ្មោះ គង់ សុផាត ភេទ ប្រុស អាយុ ២៦ឆ្នាំ មានទីលំនៅភូមិវាលធំ ឃុំវាលរេញ ស្រុកព្រៃនប់ ខេត្តព្រះសីហនុ ធ្វើដំណើរពីខេត្តព្រះសីហនុ ឆ្ពោះទៅភ្នំពេញ។
លុះដល់ចំណុចខាងលើ បានបុកចំហៀងរថយន្ត ០១គ្រឿងម៉ាក FORD ពណ៌ស ពាក់ស្លាកលេខភ្នំពេញ 2AT-1444 អ្នកបើកបរមិនស្គាល់អត្តសញ្ញាណ មានទិសដៅផ្ទុយគ្នា ក្រោយកើតហេតុម្ចាស់រថយន្ត បានរត់គេចខ្លួនបាត់។
ករណីនេះ បានបណ្ដាលឲ្យរងរបួសមនុស្ស០២នាក់ ក្នុងនោះឈ្មោះ បាន អ្នកបើកបរម៉ូតូ របួសធ្ងន់ បាក់ជើងស្តាំ និងឈ្មោះ គង់ សុផាត អ្នករួមដំណើរលើម៉ូតូ រងរបួសមធ្យម បាក់ជើងស្តាំ ត្រូវបានបញ្ជូនទៅសង្គ្រោះនៅគ្លីនិកលិគឹមឌីវាលរេញដូចគ្នា។
ចំពោះវត្ថុតាងរថយន្ត និងម៉ូតូ ត្រូវបានកម្លាំងយកទៅរក្សាទុក នៅអធិការដ្ឋាននគរបាលស្រុកព្រៃនប់ ដើម្បីរងចាំដោះស្រាយ តាមនីតិវិធី៕
មតិយោបល់