ព័ត៌មានជាតិ

អគ្គិភ័យឆេះផ្ទះប្រជាពលរដ្ឋ នៅកំពង់ចាម

កំពង់ចាម: លោកអធិការនគរបាលស្រុកចម្ការលើ បានប្រាប់ Post News ថា កាលពីវេលាម៉ោង៩ និង១៥នាទីថ្ងៃទី២០ ខែមករា ឆ្នាំ២០១៩ មានករណីអគ្គិភ័យឆេះផ្ទះប្រជាពលរដ្ឋ នៅចំណុចភូមិថ្នល់បែកកើត ឃុំស្វាយទាប ស្រុកចម្ការលើ។

ម្ចាស់ផ្ទះ​រងគ្រោះឈ្មោះ វេង ងាន់សេង ភេទប្រុស អាយុ ៣៦ ឆ្នាំ ជាតិខ្មែរ មានទីលំនៅភូមិឃុំកើតហេតុ។

ក្រោយពីទទួលបានដំណឹងភ្លាម កម្លាំងសមត្ថកិច្ច បានបញ្ចេញរថយន្ដពន្លត់អគ្គិភ័យ របស់អធិការដ្ឋាន ១គ្រឿង រថយន្ដពន្លត់អគ្គិភ័យរបស់ស្នងការដ្ឋានខេត្ត ១គ្រឿង អធិការដ្ឋានស្រុកកំពង់សៀម ១គ្រឿង និងរបស់អធិការដ្ឋានស្រុកស្ទឹងត្រង់ ១គ្រឿង ចុះទៅកន្លែងកើតហេតុ ដើម្បីការពារកុំឲ្យរាលដាលទៅផ្ទះផ្សេងទៀត។

ករណីនេះ បានប្រើប្រាស់រថយន្តពន្លត់អគ្គិភ័យសរុបចំនួន ៤ គ្រឿង អស់ទឹកចំនួន ៦ រថយន្ដ ទើបរលត់ទាំងស្រុង នៅវេលាម៉ោង១២ថ្ងៃដដែល។

សមត្ថកិច្ច បានបញ្ជាក់ថា អគ្គិភ័យនេះ បណ្តាលឲ្យរបួសស្រាលមនុស្ស២នាក់ ដោយសាររលាកអណ្ដាតភ្លើង៖ ទី១.ឈ្មោះ សឹប គឹមស៊ី ភេទស្រី អាយុ ៦៤ឆ្នាំ (ជាម្ដាយ) និងទី២.ឈ្មោះ អែន ស្រីទូច ភេទស្រី អាយុ ៣៤ ឆ្នាំ (ជាកូន) ព្រមទាំងឆេះអស់ផ្ទះ ១ខ្នង​ ទំហំ ៦x ១៤ម៉ែត្រ សង់ពីឈើប្រក់ក្បឿង ថ្មខាងក្រោម។

សម្ភារ:បាត់បង់មាន៖ ប្រាក់ ៣០ម៉ឺនរៀល គ្រែ៣ ទូខោអាវ៥ ម៉ាស៊ីនបោកខោអាវ១ ទូទឹកកក១ ស្រូវ១៥បេ ទូរទស្សន៍ ៣គ្រឿង និងសម្ភារ:ប្រើប្រាស់មួយចំនួនទៀត ។

មូលហេតុ ដោយសារដុតធូប ទុកចោល៕

មតិយោបល់