ភ្នំពេញ: មានករណីគ្រោះថ្នាក់ចរាចរណ៍មួយបានកើតឡើងរវាងរថយន្ត និងម៉ូតូម៉ាកPCX បណ្តាលឲ្យបុរសជិះម៉ូតូមានឯកសណ្ឋានយោធាម្នាក់របួសធ្ងន់កាលពីវេលាម៉ោង១រសៀលថ្ងៃទី២១ ខែមករា ឆ្នាំ២០១៩ ចំណុចបង្គោលភ្លើងលេខP876-202 តាមបណ្តោយផ្លូវ១៥១ ភូមិសំរោងត្បូង សង្កាត់សំរោង ខណ្ឌព្រែកព្នៅ រាជធានីភ្នំពេញ។
ប្រភពព័ត៌មានឲ្យដឹងថា រថយន្តម៉ាក COROLLA ពណ៌បៃតងចាស់ ពាក់ស្លាកលេខ ភ្នំពេញ 2H 7719 ធ្វើដំណើរលើផ្លូវលេខ១៥១ ក្នុងទិសដៅពីលិចទៅកើត បើកបរដោយឈ្មោះ សេង រ៉ាទី ភេទប្រុស អាយុ៣២ឆ្នាំ ជនជាតិខ្មែរ ស្នាក់នៅភូមិបឹងប្រិយ៍ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ។ លុះមកដល់កន្លែងកើតហេតុ បានបុកជាមួយម៉ូតូគ្រឿងម៉ាក HONDA PCX ពណ៌ស ពាក់ស្លាកលេខ ភ្នំពេញ 1HA-2132 ធ្វើដំណើរលើផ្លូវលេខ១៥១ ក្នុងទិសដៅពីកើតទៅលិច បើកបរដោយឈ្មោះ ព្រំ សុភា ភេទប្រុស អាយុ៣៦ឆ្នាំ ជនជាតិខ្មែរ ស្នាក់នៅភូមិបឹង សង្កាត់ពញាពន់ ខណ្ឌព្រែកព្នៅ រាជធានីភ្នំពេញ បណ្តាលឲ្យបុរសមានឯកសណ្ឋានទាហានអ្នកជិះម៉ូតូរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរភ្លាមៗផងដែរ ។
ក្រោយពេលកើតហេតុរថយន្តនិងម៉ូតូរួមទាំងអ្នកបើកបររថយន្ត ត្រូវបានសមត្ថកិច្ចនាំយកទៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញដើម្បីដោះស្រាយតាមនីតិវិធី ៕
មតិយោបល់