ភ្នំពេញៈ កម្លាំងអធិការដ្ឋាននគរបាលខណ្ឌសែនសុខ សហការជាមួយកម្លាំងអន្តរាគមន៍ខណ្ឌបានធ្វើការឃាត់ខ្លួនជនសង្ស័យ២នាក់ កាលពីវេលាម៉ោង៥ ល្ងាចថ្ងៃទី៦ ខែកក្កដា ឆ្នាំ២០១៦ ស្ថិតនៅផ្លូវ2004 ភូមិស្លែងរល្លើង សង្កាត់ទឹកថ្លា ខណ្ឌសែនសុខ។

តាមប្រភពព័ត៌មានពីសមត្ថកិច្ចបានប្រាប់ថា ជនសង្ស័យទី១.ឈ្មោះ ង៉ែត សូនិន អាយុ២៧ឆ្នាំ ស្នាក់នៅផ្ទះលេខ9B ផ្លូវលេខ271 ភូមិអូបែកក្អម សង្កាត់ទឹកថ្លា ខណ្ឌសែនសុខ រាជធានីភ្នំពេញ។ ទី២.ឈ្មោះ ឥន សូរិតែន អាយុ៣៥ឆ្នាំ ជាមុខរបររត់ម៉ូតូឌុប ស្នាក់នៅឃុំពាមឧញ្ញាអុង ស្រុកល្វាឯម ខេត្តកណ្តាល ។

ប្រភពដដែលបានប្រាប់ទៀតថា មុនពេលកើតហេតុ ខណៈដែលកម្លាំងសមត្ថកិច្ចដាក់គោលដៅត្រួតពិនិត្យច្បាប់ចរាចរណ៍ជើងគោកនៅចំណុចខាងលើ ស្រាប់តែឃើញបុរសទាំង២នាក់ ជិះម៉ូតូសង់ការ៉េឌុបគ្នា មិនពាក់មួកសុវត្ថិភាពសមត្ថកិច្ច ក៏ហៅត្រួតពិនិត្យ ដោយរកឃើញមានថ្នាំញៀន៣កញ្ចាប់ និងម៉ូតូម៉ាកសងកូរ៉េ១គ្រឿងផងដែរ។

នៅចំពោះមុខសមត្ថកិច្ចជនសង្ស័យបានសារភាពថា ថ្នាំខាងលើនេះពិតជារបស់ខ្លួនមែន ដោយទិញមកពីមុខមន្ទីរពេទ្យព្រះកុសុមះ ដើម្បីយកទៅប្រើប្រាស់។

បច្ចុប្បន្ននេះ ជសង្ស័យទាំង២នាក់ និងវត្ថុតាងខាងលើត្រូវបានសមត្ថកិច្ចនគរបាលប៉ុស្ដិ៍រដ្ឋបាលទឹកថ្លាធ្វើការសាកសួរកសាងសំណុំរឿង បញ្ជូនទៅអធិការដ្ឋាននគរបាលខណ្ឌសែនសុខ ដើម្បីចាក់ការបន្ត៕