ភ្នំពេញ: អគ្គិភ័យដ៏រន្ធត់មួយបានឆាបឆេះផ្ទះវីឡាភ្លោះមួយខ្នង អស់ស្ទើរទាំងស្រុង ខណ:ដែលម្ចាស់ផ្ទះបាននាំគ្នាចេញទៅញ៉ាំអីនៅខាងក្រៅ។
ហេតុការណ៍ដ៍គួរឲ្យភ្ញាក់ផ្អើលនោះបានកើតឡើងកាលពីវេលាម៉ោង១០យប់ ថ្ងៃទី២៣ ខែមករា ឆ្នាំ២០១៩ ត្រង់ចំណុចផ្ទះវីឡាលេខ១១ ផ្លូវលេខ១៩ ក្នុងបុរីពិភពថ្មីក្បែរផ្សារទំនើបអ៊ីអនទី២ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
តាមប្រភពព័ត៌មានពីកន្លែងកើតហេតុបានឲ្យដឹងថានៅមុនពេលកើតហេតុ គេឃើញមានផ្សែងហុយចេញមកពីក្នុងផ្ទះកើតហេតុជាន់ផ្ទាល់ដី ខណ:ដែលម្ចាស់ផ្ទះមិននៅហើយផ្ទះបានចាក់សោចោលពីខាងក្រៅ។ បន្ទប់មកក៏មានលេចចេញជាអណ្តាតភ្លើងបានឆាបឆេះ រួចក៏បង្កឲ្យមានការភ្ញាក់ផ្អើលដល់ប្រជាពលរដ្ឋដែលរស់នៅក្បែរខាង និងសន្តិសុខដែលយាមនៅក្នុងបុរីខាងលើបាននាំគ្នាទាញទុយយោទឹកបាញ់ និងយកបំពង់ពន្លត់អគ្គិភ័យទៅបាញ់ពន្លត់។ ប៉ុន្តែដោយទ្វារផ្ទះខាងលើបានជាប់សោ ទើបមិនចូលទៅបាញ់ដល់ខាងក្នុងបានហើយក៏បណ្តាលឲ្យភ្លើងកាន់តែឆាបឆេះខ្លាំងទៅៗ។ រហូតប្រជាពលរដ្ឋសម្រេចចិត្តទម្លាយទ្វារផ្ទះខាងលើ រួចក៏បានរាយការណ៍ជូនសមត្ថកិច្ចមូលដ្ឋាននិងរថយន្តពន្លត់អគ្គិភ័យឲ្យមកជួយអន្តរាគមន៍។ ក្រោយមកក៏មានរថយន្តពន្លត់អគ្គិភ័យរបស់ស្នងការនគរបាលរាជធានីភ្នំពេញបានមកដល់កន្លែងកើតហេតុនិងបានធ្វើការបាញ់ពន្លត់ជាបន្តបន្ទាប់ រហូតបាញ់ទឹកពន្លត់អស់ទឹកចំនួន១៦គ្រឿង ទើបរលត់ទៅវិញជាស្ថាពរ គឺបានរលត់នៅម៉ោង១១និង៥០នាទីយប់ថ្ងៃដដែល។
បើតាមសម្តីពីបុរសម្នាក់ឈ្មោះ គួន ហេង ដែលជាអ្នកជួលផ្ទះខាងលើបាន រៀបរាប់ប្រាប់ឲ្យដឹងថា ផ្ទះខាងលើនេះគឺគាត់បានមកជួល ស្នាក់នៅជាមួយក្រុមគ្រួសាររបស់គាត់ ដែលមានគ្នាសរុបចំនួន៧នាក់ អស់រយ:ជិតបីខែមកហើយ។ កន្លងមកផ្ទះខាងលើនេះ តែងតែមានការលោតឌីសង់ទ័រជាញឹកញាប់ ហើយគាត់ក៏បានជូនដំណឹងនេះទៅផ្ទះម្ចាស់ផ្ទះជាច្រើនដងមកហើយដែល។ មុនពេលកើតហេតុ គាត់និងក្រុមគ្រួសាររបស់គាត់ បាននាំគ្នាចេញទៅញ៉ាំអីនៅខាងក្រៅ ដោយបានចាក់សោទ្វារផ្ទះចោល។ លុះរហូតដល់វេលាកើតហេតុ ស្រាប់តែម្ចាស់ផ្ទះបានទូរសព្ទមកប្រាប់គាត់ថាភ្លើងកំពុងផ្ទះ រួចភ្លាមនោះគាត់ក៏ប្រញាប់ប្រញាល់ត្រឡប់មកវិញ តែខណ:ពេលមកដល់ផ្ទះរបស់គាត់ត្រូវបានភ្លើងកំពុងឆាបឆេះអស់ស្ទើរទាំងស្រុងទៅហើយ។
តាមប្រភពពីសមត្ថកិច្ចបានឲ្យដឹងថានៅក្នុងករណីអគ្គិភ័យខាងលើនេះ មិនបណ្តាលឲ្យមានអ្នករងរបួស ឬឆេះរាលដាលដល់ផ្ទះអ្នកជិតខាងនោះទេ គឺខូចខាតតែផ្ទះកើតហេតុដែលមានចំនួនបីជាន់ និងសម្ភារ:ជាច្រើនទៀតដែលនៅក្នុងផ្ទះត្រូវបានភ្លើងឆេះខូចអស់ស្ទើរទាំងស្រុង នៅសល់តែសម្ភារ:មួយចំនួនតូចរួមទាំងទូរដែកមួយគ្រឿងដែលមានរបស់របរមានតម្លៃរួមជាមួយប្រាក់សុទ្ធរាប់ម៉ឺនដុល្លារដែលមិនត្រូវបានភ្លើងឆាបឆេះ ហើយករណីខាងលើសមត្ថកិច្ចសណ្ឋានថាបណ្ដាលមកពីឆ្លងចរន្តអគ្គិសនីផ្ទុះសេខ្សែភ្លើង៕
មតិយោបល់