Post News Media ព័ត៌មានជាតិ ​​រថយន្តមិនចា...

​​រថយន្តមិនចាំម៉ាក បុកម៉ូតូពេញទំហឹង ស្លាប់ម្នាក់និងរបួស​ម្នាក់ រួចបើករត់​បាត់!

កំពង់ស្ពឺ: នៅ​វេលាម៉ោង៣និង១០នាទីទៀបភ្លឺ ថ្ងៃទី​២៤ ខែមករា ឆ្នាំ២០១៩ មានករណីគ្រោះថ្នាក់ចរាចរណ៍ រវាងរថយន្តមិនចាំម៉ាកបុកជាមួយម៉ូតូ បណ្តាលឲ្យស្លាប់ម្នាក់ នៅ​លើផ្លូវជាតិលេខ​៤ ចន្លោះគីឡូម៉ែត្រ៧២-៧៣ ភូមិ តាឡាត់ចាស់ ឃុំអូរ ស្រុកភ្នំស្រួច ខេត្តកំពង់ស្ពឺ។

​​​​ជនរងគ្រោះ​(អ្នកបើកបរ)មាន​ឈ្មោះ វ៉ាន់ ដុក ភេទប្រុស អាយុ​២៦​ឆ្នាំ រស់នៅភូមិ ក្រាំង ប្រស្រុក ឃុំគីរីវន្ត ស្រុកភ្នំស្រួច ខេត្តកំពង់ស្ពឺ អ្នកជិះពីក្រោយ​ឈ្មោះ សាន់ សៀម ភេទប្រុស អាយុ​៣៤​ឆ្នាំ រស់នៅភូមិឃុំជាមួយគ្នា ជិះម៉ូតូ​ម៉ាក ហុងដា សេ១២៥ ពណ៌ខ្មៅ ស៊េរី​២០១៤ ពាក់ស្លាក ភ្នំពេញ 1CG-​2994។

ក្រោយពេល​កើតហេតុ ក្រុមគ្រួសារ​បានដឹកយក​អ្នករងបួស​ឈ្មោះ សាន់ សៀម​ ទៅដល់មន្ទីរពេទ្យ​ខេត្ត អ្នករបួស​បានដឹង​ខ្លួន ហើយ​សួររក​អ្នកបើកបរ​ម៉ូតូ​។ លុះព្រឹកឡើង​វេលា​ម៉ោង​៧​នឹង​៣០​នាទី​ព្រឹក សមត្ថកិច្ច បានចុះស្រាវជ្រាវជ្រាវ ឃើញ​សព​អ្នកបើកបរ​ម៉ូតូ​ស្លាប់​នៅកន្លែងកើតហេតុ​។

ចំពោះករណីនេះ ម៉ូតូត្រូវបានសមត្ថកិច្ចប្រគល់ជូនក្រុមគ្រួសារ និង​សាកសពត្រូវបានក្រុមគ្រួសារដឹកយកទៅ ធ្វើបុណ្យទៅតាមប្រពៃណី​​។ ចំណែករថយន្តបង្ក ត្រូវបានកម្លាំងជំនាញ កំពុងស្រាវជ្រាវ​​ចាប់យកមក​ចាត់ការតាមនិតិវិធីច្បាប់៕​