ភ្នំពេញ: កាលពីវេលាម៉ោង៩និង៥០នាទីយប់ ថ្ងៃទី២៥ ខែមករា ឆ្នាំ២០១៩ មានករណីភ្ញាក់ផ្អើលមួយបានកើតឡើង ក្រោយពីមាននាយទាហានម្នាក់ ចេញពីហូបការ ជិះម៉ូតូក្នុងស្ថានភាពស្រវឹងទ្រេតទ្រោត ហើយឆ្លងកាត់គោលដៅត្រួតពិនិត្យ អនុវត្តច្បាប់ចរាចរណ៍របស់អធិការដ្ឋាននគរបាលខណ្ឌទួលគោក សមត្ថកិច្ចហៅឲ្យឈប់អែបខាងដើម្បីត្រួតពិនិត្យ បែរជាប្រើសម្ដីអសីលធម៌ដាក់មន្ត្រីនគរបាលចរាចរណ៍ ទើបសមត្ថកិច្ចចាប់វាស់ជាតិអាកុល ផាកពិន័យតែម្ដង នៅមុខសណ្ឋាគារផ្កាឈូកទិព្វ តាមបណ្តោយផ្លូវមុន្នីរ៉េត សង្កាត់ផ្សារដើមគ ខណ្ឌទួលគោក រាជធានីភ្នំពេញ។
បុរសខាងលើមានឈ្មោះ ស្រ៊ាង ពិសិដ្ឋ មុខរបរ នាយទាហាន កងយោធពលខេមរភូមិន្ទ កងឯកភាព មជ្ឃមណ្ឌលបោសសំអាតមីន ក.ម.ជ ឋានន្តរសក្ដិ វរសេនីយ៍ត្រី (ស័ក្តិ៤) អត្តលេខ 058613។
ជាក់ស្ដែងបើតាមការផ្លុំពិនិត្យនោះ សមត្ថកិច្ចរកឃើញថាមានកម្រិតជាតិអាល់កុល ១,០៣ មីលីក្រាម /ក្នុង១លីត្រខ្យល់ រួចសមត្ថកិច្ចចេញលិខិតផាកពិន័យ យោងតាមច្បាប់ចរាចរណ៍ដែលបានចែងក្នុងមាត្រា៧៧ នៃច្បាប់ចរាចរណ៍ផ្លូវគោកថ្មី។
សូមបញ្ជាក់ផងដែរថា ច្បាប់ចរាចរណ៍ផ្លូវគោកថ្មី មាត្រា៧៧ បានចែងដូចខាងក្រោម មាត្រា៧៧ ជនណាបើកបរយានយន្តនៅពេលដែលខ្លួនស្ថិតក្នុងភាពស្រវឹង ដោយមានជាតិអាល់កុលចាប់ពី 0,40 (សូន្យក្បៀសសែសិប) មីលីក្រាមក្នុងមួយលីត្រខ្យល់ ឬចាប់ពី 0,80 (សូន្យក្បៀសប៉ែតសិប) ក្រាមក្នុងមួយលីត្រឈាម ឡើងទៅ ត្រូវផ្ដន្ទាទោស ដាក់ពន្ធនាគារពី ១ខែ ទៅ ៦ខែ និងពិន័យជាប្រាក់ ៨០០,០០០ រៀល (ប្រាំបីសែនរៀល) ទៅ ៤០០០,០០០ រៀល (បួនលានរៀល)។
បច្ចុប្បន្ន បន្ទាប់មកនគរបាលចរាចរណ៍ក៏អនុញ្ញាតឲ្យត្រលប់ទៅផ្ទះវិញផងដែរ ក្រោយពីធ្វើការផាកពិន័យតាមច្បាប់រួច៕
មតិយោបល់