ភ្នំពេញៈ ជនសង្ស័យម្នាក់ ត្រូវកម្លាំងសមត្ថកិច្ចខណ្ឌឫស្សីកែវ សហកាជាមួយសមត្ថកិច្ចប៉ុស្តិ៍ឫស្សីកែវ និងប្រជាការពារផងនោះ បានចុះល្បាតឃាត់ខ្លួនជនសង្ស័យម្នាក់ ព្រមទាំងបានដកហូតបានថ្នាំញៀន ១កញ្ចប់ កាលពីវេលាម៉ោង២និង៣០នាទីយប់ថ្ងៃទី០៧ ខែកក្កដា ឆ្នាំ២០១៦ ស្ថិតនៅចំណុចផ្លូវជាតិលេខ៥ ក្រុម២០ ភូមិសាមគ្គី សង្កាត់ឫស្សីកែវ ខណ្ឌឫស្សីកែវ។

ជនសង្ស័យដែលកម្លាំងសមត្ថកិច្ចឃាត់ខ្លួនមានឈ្មោះ មិន ពៅ ភេទប្រុស អាយុ៣១ឆ្នាំ មុខរបរ អ្នករត់ម៉ូតូឌុប ស្នាក់នៅផ្ទះជួល ភូមិសាមគ្គី សង្កាត់ឫស្សីកែវ ខណ្ឌឫស្សីកែវ។

លោក ណាយ ច័ន្ទណារ័ត្ន មន្ត្រីផ្នែកព្រហ្មទណ្ឌខណ្ឌ បានឲ្យដឹងថា ខណ:ដែលកម្លាំងសមត្ថកិច្ចយើងកំពុងតែជិះល្បាតទប់ស្កាត់បទល្មើស ស្រាប់តែឃើញជនសង្ស័យម្នាក់បានជិះម៉ូតូ មួយគ្រឿង ម៉ាក SIRIUS ពណ៌ក្រហមលាយខ្មៅ ពាក់ស្លាកលេខ ភ្នំពេញ 1FE-1503 ដោយមានការសង្ស័យ ទើបកម្លាំងសមត្ថកិច្ចយើងបានធ្វើការឃាត់ឆែកឆេររកឃើញថ្នាំ១កញ្ចប់ ជាប្រភេទម៉ាទឹកកក ហើយសមត្ថកិច្ចយើងបានយកប៉ុស្តិ៍ឫស្សីកែវ ដើម្បីធ្វើការសាកសួរ។

បច្ចុប្បន្នជនសង្ស័យខាងលើ ត្រូវបានកម្លាំងសមត្ថកិច្ចបញ្ជូនទៅឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីបញ្ជូនទៅកាន់តុលាការ ចាត់ការតាមនីតិវិធិច្បាប់៕