ភ្នំពេញៈ រថយន្តកាមរីហាយប្រ៊ីត បើកលឿនទៅបុករថយន្តម៉ាស័រដា ដែលបើកឆ្លងផ្លូវខ្វះការប្រុងប្រយ័ត្ន បណ្ដាលឲ្យរងការខូចខាតទាំងសងខាង កាលពីវេលាម៉ោង១២និង២០នាទីរំលងអធ្រាត្រ ឈានចូលថ្ងៃទី២៩ ខែមករា ឆ្នាំ២០១៨ ត្រង់ចំណុចស្តុបដេកាសេ ក្បែរធនាគារកាណាឌីយ៉ា ស្ថិតក្នុងសង្កាត់មនោរម្យ ខណ្ឌ៧មករា។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញ បុរសម្នាក់បើកបររថយន្តមួយគ្រឿងម៉ាក ម៉ាស័រដាBT50 ពណ៌ស ពាក់ស្លាកលេខ ភ្នំពេញ 2AJ-2259 និងមាននារី២នាក់ទៀតរួមដំណើរជាមួយ តាមបណ្តោយមហាវិថីព្រះមុនីវង្ស ទិសដៅពីជើងទៅត្បូង ក្នុងល្បឿនយ៉ាងលឿន។ លុះមកដល់ចំណុចកើតហេតុ ក៏បានឆ្លងស្តុបដោយខ្វះការប្រុងប្រយ័ត្ន ខណៈពេលនោះស្រាប់តែមានរថយន្តមួយគ្រឿងទៀតម៉ាក កាមរីហាយប្រ៊ីត ពណ៌ស ពាក់ស្លាកលេខ ភ្នំពេញ 2AN-5731 បើករដោយបុរសម្នាក់និងនារីម្នាក់ តាមបណ្ដោយមហាវិថីសហព័ន្ធរុស្ស៊ី ទិសដៅពីលិចទៅកើត ក្នុងល្បឿយ៉ាងលឿនដូចហោះជ្រុលទៅបុករថយន្តម៉ាស័រដាចំពាក់កណ្តាលពេញទំហឹង បណ្ដាលឲ្យរថយន្តម៉ាស័រដា រងការខូចខាតកំពិតទ្វារមួយចំហៀងខាងស្តាំ។ ចំណែកឯរថយន្តកាមរីរងការខូចខាតកំពិតផ្នែកខាងមុខយ៉ាងដំណំ តែមិនបង្កឲ្យមាននរណាម្នាក់រងរបួសនោះទេ។
ក្រោយពេលកើតហេតុដោយភាគីខាង២មិនអាចចរចាដោះស្រាយគ្នាបាន សមត្ថកិច្ចមូលដ្ឋានក៏បានទាក់ទងទៅសមត្ថកិច្ចជំនាញឲ្យចុះមកធ្វើការវាស់វែងយករថយន្តទាំង២គ្រឿងទៅរក្សាទុកនៅអធិការដ្ឋាននគរបាលខណ្ឌ៧មករារង់ចាំធ្វើការដោះស្រាយគ្នាទៅតាមផ្លូវច្បាប់នៅពេលក្រោយ៕
មតិយោបល់