ភ្នំពេញៈ យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា ជនសង្ស័យ២នាក់ ជាមុខសញ្ញាលួចរថយន្ត ត្រូវបានកម្លាំងអធិការដ្ឋាននគរបាលខណ្ឌសែនសុខ សហការជាមួយកម្លាំងកងរាជអាវុធហត្ថរាជធានីភ្នំពេញ ធ្វើការឃាត់ខ្លួនជនពាក់ពន្ធ័ករណីលួចរថយន្ត និងទ្រព្យសម្បត្តិ កាលពីថ្ងៃទី២៦ ខែមករា ឆ្នាំ២០១៩ វេលាម៉ោង៦និង០០នាទី នៅចំណុចក្នុងបុរី ជីម៉ុង ឡែន ផ្ទះលេខ២៨ ផ្លូវបេតុង ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ជនសង្ស័យឈ្មោះ រដ្ឋា មាន ភេទប្រុស អាយុ៣៣ឆ្នាំ មុខរបរ មិនពិតប្រាកដ ស្នាក់នៅផ្ទះជួលភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ មានសារធាតុញៀន និងឈ្មោះ ពូន សុគន្ធ ភេទប្រុស អាយុ៣២ឆ្នាំ មុខរបរកម្មករ ស្នាក់នៅផ្ទះគ្មានលេខ ស្រុកស្អាង ខេត្តកណ្តាល មានសារធាតុញៀន។
ជនរងគ្រោះក្នុងករណីលួចមានឈ្មោះ ស៊ូ លីន ភេទប្រុស អាយុ៦១ឆ្នាំ មុខរបរ មន្ត្រីអាកាសចរណ៍ស៊ីវិល ស្នាក់នៅ ផ្ទះលេខ២៨ ផ្លូវបេតុង ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ។
សម្ភារៈបាត់បង់៖ រថយន្ត១គ្រឿង ម៉ាកឡិចស៊ីស ៥៧០ ពណ៌ស ពាក់ស្លាកលេខ ភ្នំពេញ2AF-2557,ទូរសព្ទ័ដៃ៣គ្រឿង,នាឡិកា១គ្រឿង,ខ្សែកពេជ្រ១ខ្សែ,កាបូបមានលុយ២០០០ដុល្លារចំនួន១ និងសម្ភារៈមួយចំនួន ។
សមត្ថកិច្ចឲ្យដឹងថា មុនពេលកើតហេតុ នៅព្រលប់ ថ្ងៃទី២៥ ខែមករា ឆ្នាំ២០១៩ ជនរងគ្រោះ បាននាំគ្នាអង្គុយផឹកស្រានៅចំណុចខាងលើ រហូតដល់ម៉ោង៣និង០០នាទីឈានចូលថ្ងៃទី២៦ ខែមករា ឆ្នាំ២០១៩ ជនរងគ្រោះ និងមិត្តភក្តិបានបែកផ្លូវគ្នា រួចជនរងគ្រោះបានចូលទៅដេកក្នុងផ្ទះ តែមិនបានចាក់សោទ្វារផ្ទះទេ។ លុះដល់ម៉ោង៦ និង០០នាទី ជនរងគ្រោះបានក្រោកពីដេកមិនឃើញឡានរបស់ខ្លួនទុកនៅខាងមុខផ្ទះ ក៏មានការផ្អើលឆោឡោ ទៅដាក់ពាក្យបណ្តឹងនៅប៉ុស្តិ៍រដ្ឋបាលភ្នំពេញថ្មី ។ លុះដល់ថ្ងៃទី២៨ ខែមករា ឆ្នាំ២០១៩ វេលាម៉ោង២និង៤៥នាទីរសៀល សមត្ថកិច្ចបានធ្វើការឃាត់ខ្លួនជនសង្ស័យខាងលើ នៅចំណុចក្លឹបប្ល៊ូឡាញ សង្កាត់បឹងទំពុន ខណ្ឌមានជ័យ។
បច្ចុប្បន្ន ជនសង្ស័យត្រូវបានសមត្ថកិច្ចកសាងសំណុំរឿងអនុវត្តតាមនីតិវិធី ៕
មតិយោបល់