Post News Media ព័ត៌មានជាតិ រថយន្តមិនស្គា...

រថយន្តមិនស្គាល់ ស្លាកលេខ ភ្នំពេញ 2R-5599 បុកម៉ូតូមួយគ្រឿង បណ្តាលឲ្យបុសម្នាក់របួសធ្ងន់ រួចបើកគេចបាត់

ភ្នំពេញ: បុរសដែលជាជនរងគ្រោះម្នាក់ បានត្រឹមតែកាន់ស្លាកលេខរថយន្ត១បន្ទះ យកមកដាក់ពាក្យបណ្ដឹងសមត្ថកិច្ចប៉ុស្តិ៍ភ្នំពេញថ្មី ក្រោយត្រូវរថយន្តមិនស្គាល់ម៉ាក បុកបណ្តាលឲ្យរងរបួសធ្ងន់។

ហេតុការណ៍នេះ បានកើតឡើងកាលពីវេលាម៉ោង១១ និង២០នាទី ថ្ងៃទី៥ ខែកុម្ភ: ឆ្នាំ២០១៩ ស្ថិតនៅតាមបណ្តោយផ្លូវហាណូយ កែងនិងផ្លូ១៩៧០ ភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ជនរងគ្រោះឈ្មោះ ប៉ន ជឿន អាយុ២៩ឆ្នាំ មុខរបរជាអ្នកដើររៀបចំរោងបុណ្យ និងរោងការ
ស្នាក់នៅបន្ទប់ជួល សង្កាត់ទួលសង្កែ ខណ្ឌឬស្សីកែវ។

តាមសម្តីជនរងគ្រោះបានឲ្យដឹងថា មុនពេលកើតហេតុ រូបគាត់បានជិះម៉ូតូត្រលប់មកពីលេងស្រុកកំណើត នៅឯខេត្តកំពត
លុះត្រលប់មកដល់ចំណុចកើតហេតុ ក៏ត្រូវរថយន្តពុំចាំម៉ាក បើកបុកគាត់បណ្តាលឲ្យរងរបួសធ្ងន់ រួចបើករត់បាត់ បន្សល់ទុកស្លាកលេខមួយបន្ទះ (ភ្នំពេញ 2R-5599) នៅកន្លែងកើតហេតុ។

ក្រោយពេលកើតហេតុជនរងគ្រោះ បានជិះម៉ូតូយកស្លាកលេខមកប្តឹងនគរបាលរដ្ឋបាលប៉ុស្តិ៍ភ្នំពេញ ដើម្បីឲ្យសមត្ថកិច្ចជំនាញជួយស្រាវជ្រាវ និងស្វែងរកម្ចាស់រថយន្តបង្ក ចូលខ្លួនមកដោះស្រាយគ្នាតាមផ្លូវច្បាប់
ចំណែកជនរងគ្រោះ ត្រូវបានក្រុមគ្រួសារបញ្ជូនទៅសំរាកព្យាបាលនៅមន្ទីរពេទ្យ៕