Post News Media ព័ត៌មានជាតិ យុវជន ៣នាក់ ត...

យុវជន ៣នាក់ ត្រូវក្រុមក្មេងស្ទាវជិះម៉ូតូជិត២០គ្រឿង ដេញកាប់ របួសយ៉ាងដំណំ នៅខណ្ឌទួលគោក

ភ្នំពេញ: ករណីហិង្សាមួយ បានបង្កឲ្យមានការភ្ញាក់ផ្អើល ដល់អ្នកដំណើរ និងប្រជាពលរដ្ឋនៅកំណាត់ផ្លូវលេខ៦១៤ ដោយ
ក្រុមក្មេងស្ទាវ​មានគ្នាជិត២០ម៉ូតូ​ ដេញកាប់យុវជន៣នាក់ ជិះម៉ូតូ​មួយគ្រឿង​ ម៉ាក ICON បណ្ដាលឲ្យរងរបួសធ្ងន់​។

ហេតុការណ៍នេះ​ កើតមានឡើងកាលពីវេលាម៉ោង០១ និង៣០នាទីរំលងអធ្រាត្រ​ ឈានចូលថ្ងៃទី​០៨​ ខែកុម្ភ:​ ឆ្នាំ២០១៩​ ត្រង់ចំណុច​ជិតសណ្ឋាគារស្រែលាភ ស្ថិតនៅសង្កាត់បឹកកក់ទី២ ខណ្ឌទួលគោក​ រាជធានីភ្នំពេញ​។

ជនរងគ្រោះ​មិនស្គាល់អត្តសញ្ញាណទេ បានជិះម៉ូតូម៉ាក Honda ICON ពណ៌ត្រួយចេក ពាក់ស្លាកលេខភ្នំពេញ​ 1AR-5338​ បានរងរបួសធ្ងន់​ ដេកស្ដូកស្ដឹងក្នុងថ្លុកឈាម​ ត្រូវបានដឹកយកទៅសង្គ្រោះនៅឯមន្ទីរពេទ្យ ដោយរថយន្តគ្លីនិចឯកជនមួយ។

ប្រភពពីកន្លែងកើតហេតុ បានឲ្យដឹងថា នៅមុនពេលកើតហេតុ​ គេឃើញយុវជន៣នាក់ ជិះម៉ូតូ​មួយគ្រឿង​ ឌុបគ្នាតាមបណ្ដោយផ្លូវបេតុង​ មកដល់ចំណុចខាងលើ​ ក៏ជួបក្រុមក្មេងស្ទាវមួយក្រុម ជិះម៉ូតូជិត២០គ្រឿង​ ប្រដាប់ដោយ​កាំបិត​ និងដាវ​សាម៉ូរ៉ៃ​ នាំគ្នាដេញកាប់យុវជនទាំង៣នាក់ បណ្ដាលឲ្យរងរបួសយ៉ាងដំណំ។ ដោយឮសំទ្បេងស្រែកឲ្យជួយ ទើបមានអ្នកភូមិចេញមកមើល​ ឃើញមានឈាមដាបទាំងថ្លុក នៅកន្លែងម៉ូតូជនរងគ្រោះ និងស្នាមឈាមពេញកន្លែងកើតហេតុ​ ក៏បានរាយការណ៍ប្រាប់សមត្ថកិច្ច ឲ្យចុះមកអន្តរាគមន៍​ និងទាក់ទងរករថយន្តសង្គ្រោះបន្ទាន់​ ឲ្យមកយកជនរងគ្រោះទៅមន្ទីរពេទ្យ។

ក្រោយកើតហេតុ​សមត្ថកិច្ចមូលដ្ឋាន បានចុះមកដល់កន្លែង​ ហើយសាកសួរប្រជាពលរដ្ឋ ​ដើម្បីធ្វើកំណត់ហេតុ​ទុក​ រួចយកម៉ូតូជនរងគ្រោះ​ ទៅរក្សាទុក​បណ្ដោះអាសន្ន​ រងចាំភាគីខាងរងគ្រោះ​ យកឯកសារមកបញ្ជាក់​ ហើយប្រគល់ជូនវិញ។

បច្ចុប្បន្នសមត្ថកិច្ច បាន​ធ្វើការស្រាវជ្រាវ​រកបក្ខពួកក្រុមជនដៃដល់ ទាំងនោះ​ យកមកផ្ដន្ទាទោស តាមផ្លូវច្បាប់​៕