ភ្នំពេញ៖ សមត្ថកិច្ចប៉ុស្តិ៍កាកាបប្រទះឃើញចោរប្រដាប់ដោយកាំភ្លើងកែច្នៃចរន្តអគ្គិសនីកំពុងតែធ្វើសកម្មភាព បាញ់សត្វឆ្កែតែត្រូវសមត្ថកិច្ចធ្វើការដេញចាប់យ៉ាងប្រសេកប្រសាចពេញផ្លូវបង្កការភ្ញាក់ផ្អើលទាំងកណ្តាលយប់។
ហេតុការណ៏នេះបានកើតឡើងកាលពីវេលាម៉ោង១និង០៥នាទីរំលងអាធ្រាតឈានចូលថ្ងៃទី១១ ខែកញ្ញា ឆ្នាំ២០១៤ នៅតាមបណ្តោយផ្លូវសហព័ន្ឋរុស្សី ទល់មុខនិងដេប៉ូលក់គ្រឿងសំណង់គ្រប់ប្រភេទ ថាន ព្រិល ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ។
ប្រភពពត៌មានពីកន្លែងកើតហេតុបានឲ្យដឹងថា នៅពេលកើតហេតុមានចោរចំនួន២នាក់ប្រដាប់ដោយ កាំភ្លើងកែច្នៃអគ្គិសនីបានធ្វើសកម្មភាពបាញ់សត្វឆ្កែនៅម្តុំភូមិចំការឪឡឹកក្រោយមកក៏ប្រទះនិងសមត្ថកិច្ចដែលកំពុងធ្វើការជិះល្បាត បន្ទាប់មកសមត្ថកិច្ចក៏ចាប់ផ្តើមដេញស្ទាក់ចោរទាំង២នាក់នោះ ប៉ុន្តែចោរទាំង២នាក់នោះ បានដឹងខ្លួន ទាន់ក៏បានបើកម៉ូតូរត់គេចខ្លួនយ៉ាងលឿនពីភូមិចំការឪឡឹករហូតមកដល់រង្វង់មូលចោមចៅ ហើយសមត្ថកិច្ចនៅតែ បន្តសកម្មភាពដេញតាមចោរទាំង២នាក់នោះ រហូតមកដល់ចំណុចក្បែរនិងអាកាសយាន្តដ្ឋានភ្នំពេញអន្តរជាតិ ទល់មុខនិងដេប៉ូលក់គ្រឿងសំណង់គ្រប់ប្រភេទ ថាន ព្រិល សមត្ថកិច្ចជិះម៉ូតូដេញបំបុកនិងម៉ូតូចោរទាក់ឆ្កែ ទាំង២នាក់នោះ បណ្តាលឲ្យម៉ូតូសមត្ថកិច្ចនិងម៉ូតូចោរទាក់ឆ្កែទាំង២នាក់នោះដួលពេញផ្លូវ ។បន្ទាប់មកសមត្ថកិច្ចបានធ្វើការឃាត់ខ្លួនចោរទាក់ឆ្កែបាន១នាក់មានឈ្មោះថា សុយ សុធី អាយុ៣២ឆ្នាំ ស្នាក់នៅភូមិគោកឃ្លៀង សង្កាត់កាកាប ខណ្ឌពោធិ៍សែនជ័យ ព្រមទាំងឧបករណ៏សម្រាប់បាញ់ឆ្កែមានដូចជា កាំភ្លើងកែច្នៃចរន្តអគ្គិសនី,ចម្ពាមកៅស៊ូ,ខ្សែភ្លើងអាគុយនិងសំភារៈផ្សេងៗទៀត។ចំណែកឯម្នាក់ទៀតបានរត់គេចខ្លួនបាត់ស្រមោល ក្រោយពេលកើតហេតុសមត្ថកិច្ចបានធ្វើការឃាត់ខ្លួននិងនាំខ្លួនទៅកាន់អធិការដ្ឋាននគរបាលខណ្ឌពោធិ៍សែនជ័យដើម្បីសាកសួរនិងកសាងសំនុំរឿងបញ្ជូនទៅតុលាកា៕
មតិយោបល់