Post News Media ព័ត៌មានជាតិ ជិះម៉ូតូ​បញ្ច...

ជិះម៉ូតូ​បញ្ច្រាស​ទិស​ ទៅ​បុក​កង់បី​ឥណ្ឌា​ នៅក្រោម​​ស្ពាន​អាកាស​៥មករា រង​របួស​ធ្ងន់ស្រាល ៣នាក់

ភ្នំពេញ: កាលពីវេលា​ម៉ោង​១ និង១០នាទីរំលង​អធ្រាត្រ ​ឈានចូល​ថ្ងៃ​ទី​១៤​ ខែកុម្ភ:​ ឆ្នាំ​២០១៩​ យុវជន​ពីរ​នាក់ជិះ​ម៉ូតូ​រត់គេចចេញពីគេដេញវៃតាមផ្លូវ បញ្ច្រាស​ទិស​ដៅ​ចរាចរណ៍​ ​ បណ្តាលឲ្យ​ជ្រុល​ទៅ​បុក​ម៉ូតូ​កង់បី​ឥណ្ឌា​ចំពីមុខ​ពេញទំហឹង​ ត្រង់ចំណុច​ផ្លូវ​ក្រោម​ដី​ស្ពាន​អាកាស​៥មករា​ ស្ថិត​ក្នុង​សង្កាត់​ផ្សារដេប៉ូទី៣​ ខណ្ឌ​ទួលគោក​។

សមត្ថកិច្ច បាន​ឲ្យ​ដឹង​ថា​ មុន​ពេល​កើត​ហេតុ​ គេឃើញ​ម៉ូតូ​កង់បី​ឥណ្ឌា​មួយ​គ្រឿង​ម៉ាក​ បាចា​ ពណ៌​លឿង​ ពាក់ស្លាកលេខ​ ភ្នំពេញ​1HG-3673 ធ្វើដំណើរ​ពី​ជើងទៅត្បូង តាមបណ្ដោយ​ផ្លូវ​២៨៩​ ​​រួច​ក៏​បាន​បើកចូលទៅផ្លូវក្រាម​ដី​ បំណង​បត់​ឆ្វេង​ទៅមហា​វិថី​សហព័ន្ធ​រុស្ស៊ី។

មកដល់ចំណុច​កើតហេតុ​ ស្រាប់​តែ​ម៉ូតូ​មួយគ្រឿង​ទៀត​ម៉ាក​ សងប៉ិច​ ពណ៌​ខ្មៅ​ ពាក់ស្លាកលេខ​ កំពង់ចាម​1M-0796 បើកដោយ​យុវជន​ពីរ​នាក់​ ​បញ្ច្រាស​ទិស​​ចរាចរណ៍​ ​ក្នុងល្បឿយ៉ាងលឿនជ្រុលទៅបុកម៉ូតូ​កង់បី​ឥណ្ឌា​​ចំពី​មុខ​ពេញ​ទំហឹង​ បណ្តោយ​ឲ្យ​ម៉ូតូ​កង់បី រង​ការខូចខាត​ក្រពឹត​ និងបែក​កញ្ចក់​ខាងមុខ​ រីឯ​អ្នក​បើកបរ​រងរបួសបែកក្បាល​។ ចំណែក​ឯម៉ូតូរងការខូចខាត​វៀចផ្នែកខាងមុខ​យ៉ាង​ដំណំ​ រីឯអ្នកបើកបររបួសបាក់ដៃខាង​ឆ្វេង​ និងអ្នក​អង្គុយ​ខាងក្រោយ របួសបែកក្បាល​។

ក្រោយ​​កើត​ហេតុ​ អ្នក​បើកបរ​ម៉ូតូ​កង់បី​ឥណ្ឌា​ ត្រូវ​បាន​រថយន្ត​សង្គ្រោះ​បន្ទាន់​ដឹក​យក​ទៅ​សង្គ្រោះ​ភ្លាមៗ​ ដោយ​ឡែក​ម៉ូតូ​ និង​ម៉ូតូ​កង់​បី ​ត្រូវ​បាន​សមត្ថកិច្ច​​ចុះ​មក​ធ្វើការ​វាស់​វែង ​យកទៅ​រក្សា​ទុក​នៅ​អធិការ​ដ្ឋាន​នគរបាល​ខណ្ឌ​ទួលគោក ​​រង់ចាំ​ធ្វើ​ការ​ដោះស្រាយ​​ពេល​ក្រោយ​៕

Loading...