កំពង់ធំៈ ករណីគ្រោះថ្នាក់ចរាចរណ៍ ម៉ូតូមួយគ្រឿងជិះឌុបគ្នា២នាក់ បើកលឿនដូចព្យុះ ជ្រុលទៅបុកម៉ូតូសណ្តោងរ៉ឺម៉ក លាន់ដូចរន្ទះ បណ្តាលឲ្យមនុស្ស២នាក់ស្លាប់ និងរបួសធ្ងន់ម្នាក់ កាលពីវេលាម៉ោង៨និង២០នាទីយប់ ថ្ងៃទី៧ ខែកក្កដា ឆ្នាំ២០១៦ នៅលើផ្លូវជាតិលេខ៦ ចំណុចភូមិឫស្សីជៈ ឃុំត្បែង ស្រុកកំពង់ស្វាយ ខេត្តកំពង់ធំ។
ប្រភពឲ្យដឹងថា ហេតុការណ៍ខាងលើនេះ អ្នកជិះម៉ូតូម៉ាកវេវអ៊ី មួយគ្រឿង ឌុបគ្នា២នាក់ ពណ៌ត្រួយចេក ពាក់ស្លាកលេខ សៀមរាប1B- 8459 ឈ្មោះ ញ៉ក់ ចេន ភេទប្រុស អាយុ៣៣ឆ្នាំ រស់នៅភូមិឫស្សីដួច ឃុំសាលាវិស័យ ស្រុកប្រាសាទបល្ល័ង្គ (ស្លាប់នៅហ្នឹងកន្លែងកើតហេតុ) អ្នករួមដំណើរឈ្មោះ គៀម ហាវ ភេទប្រុស អាយុ៦៧ឆ្នាំ(ស្លាប់នៅមន្ទីពេទ្យ)។ ចំណែកអ្នកបើកម៉ូតូសេ១០០ ពណ៌ព្រីងទុំ គ្មានស្លាកលេខ ឈ្មោះ ភឹម ឆើត ភេទប្រុសអាយុ២៥ឆ្នាំ រស់នៅភូមិប្រាសាទ ឃុំត្រពាំងឫស្សី ស្រុកកំពង់ស្វាយ(របួសធ្ងន់)។
ប្រភពបន្តថា តាមការសន្និដ្ឋានរបស់សមត្ថកិច្ច ដែលបានចុះទៅធ្វើកំណត់ហេតុ បានបញ្ជាក់ថា មូលហេតុបើកបញ្ច្រាសទិសគ្នា ដោយមិនប្រកាន់ស្តាំរបស់អ្នកបើកម៉ូតូសណ្តោងរ៉ឺម៉ក។
បច្ចុប្បន្ន សមត្ថកិច្ចជំនាញកសាងសំណុំរឿងដោយប្រមូលយកវត្ថុតាង មករក្សាទុកនៅអធិការដ្ឋាននគរបាលស្រុកកំពង់ស្វាយ ដើម្បីឲ្យសាច់ញាតិជនរងគ្រោះ ចូលមកដោះស្រាយតាមនិតិវិធី៕
មតិយោបល់