Post News Media ព័ត៌មានជាតិ ជនជាតិ​ចិន​ ប...

ជនជាតិ​ចិន​ បើករថយន្ត​បំពានភ្លើងសញ្ញាចរាចរណ៍ ​ទៅ​បុក​រថយន្ត​មួយគ្រឿង ​បញ្ចប់រឿងជាមួយសំណង ៥០០០០ដុល្លារ

ភ្នំពេញ: ជនជាតិ​ចិន​ប្រុស​ស្រី​មួយ​ក្រុម​ បានបើករថយន្ត​ស៊េរី​ទំនើប​មួយ​គ្រឿង​​យ៉ាង​លឿន​ ដោយ​បំពានភ្លើងសញ្ញចរាចរណ៍​ ក៏​ជ្រុលចង្កូត​ទៅ​បុក​រថយន្ត​មួយគ្រឿង ដែល​កំពុងបើកឆ្លង​ផ្លូវ​ចំពេញ​ទំហឹង​ កាលពីវេលា​ម៉ោង​១រំលង​អធ្រាត្រ​ឈានចូល​ថ្ងៃ​ទី​២៥​ ខែកុម្ភ:​ ឆ្នាំ​២០១៩​ ត្រង់ចំណុច​ស្តុប​ពេទផន​ ស្ថិតក្នុងសង្កាត់​ទឹកល្អក់​ទី​៣​ ខណ្ឌ​ទួលគោក​។

តាមប្រភពព័ត៌មានពីកន្លែង​កើតហេតុ​ បាន​ឲ្យដឹងថា ​នៅ​មុន​ពេល​កើត​ហេតុ​ គេឃើញ​យុវជន​បីនាក់​ បើក​រថយន្ត​មួយគ្រឿង ម៉ាក​ តូយូតា​ព្រូស​ ពណ៌ស​ គ្មានស្លាកលេខ​ ដោយធ្វើដំណើរតាម​បណ្តោយផ្លូវ​១៨២​ ក្នុងទិស​ដៅ​ពី​កើត​ទៅ​លិច​។

លុះមកដល់​ស្តុប​កើតហេតុ​ ក៏​បានបើក​ឆ្លង​កាត់​ផ្លូវ​ម៉ៅសេទុង​ឆ្ពោះទៅ​មុខ​ដោយ​ភ្លើង​សញ្ញា​ចរាចរណ៍ ​ពណ៌​បៃតង​។ ខណ:​ពេល​ដែល​បើក​ឆ្លង​ បាន​ពាក់​កណ្តាល​ផ្លូវ​ ស្រាប់​តែ​មាន​រថយន្ត​មួយ​គ្រឿង​ទៀត​ម៉ាក​ហ៊ីយ៉ាន់ដាយ​អ៊េចវ័ន​ ពណ៌ស​ ពាក់ស្លាកលេខ​ ភ្នំពេញ​ 2AR-6573 បើកបរ​ដោយ​ជនជាតិ​ចិន​ប្រុស​ស្រី​បី​នាក់​ តាម​បណ្តោយ​ផ្លូវ​ម៉ៅសេទុង​ ​ទិសដៅ​ពី​ជើងទៅត្បូង​យ៉ាងលឿន។ ដោយមិន​គោរព​ភ្លើង​សញ្ញា​ចរាចរណ៍​ពណ៌​ក្រហម​ ក៏ជ្រុល​ទៅ​បុក​រថយន្ត​ព្រូស​ពីមុខចំហៀង​ខាងឆ្វេងពេញទំហឹង​ បណ្តាល​ឲ្យ​រថយន្ត​ព្រូស​រេចង្កូត​ទៅ​ខាង​ស្តាំបុក​និងឡើងលើខឿន​ នៅ​ខាងមុខ​ស្ថានីយ​ប្រេង​ឥន្ធន:​ សូគីម៉ិច​ បណ្តាល​ឲ្យខឿនបាក់​អស់មួយ​ផ្ទាំង​។

ចំណែកឯ​រថយន្ត​ព្រូស​រងការ​ខូចខាត​ក្រពឹត ​និង​ដាច់​ក្រឡេ​កង់​ខាងមុខ​ចំហៀង​ខាង​ឆ្វេង​ ទៅ​មុខ​លែង​រួច​។ ដោយ​ឡែក​រថយន្ត​បង្ក​របស់​ជនជាតិ​ចិន ​រងការខូចខាត​ក្រពឹតផ្នែកខាងមុខ​យ៉ាង​ដំណំ​ ប៉ុន្តែ​មិនបង្ក​ឲ្យ​មាន​នរណា​ម្នាក់​រងរបួស​នោះ​ទេ។

ក្រោយ​ពេល​កើត​ហេតុ​ សមត្ថកិច្ច​មូល​ដ្ឋាន ​និង​សមត្ថកិច្ច​ជំនាញ​ក៏​បាន​ចុះមក​ដល់​កន្លែង​កើត​ហេតុ​ ហើយក៏មាន​តំណាង​ភាគី​ទាំងពីរ​ចូលមក​ធ្វើការ​ដោះស្រាយ​គ្នា​ ដោយ​ភាគី​ខាង​រថយន្ត​បង្ក​មិន​ចង់​មាន​រឿង​រ៉ាវ​វែង​ឆ្ងាយ​ ក៏​ព្រម​ចេញ​សំណង​ចំនួន​៥០០០០ដុល្លារ​ឲ្យ​ទៅ​ភាគី​ខាង​រថយន្ត​រងគ្រោះ ​ដើម្បី​បញ្ចប់​រឿង​នៅ​និង​កន្លែង​កើត​ហេតុ​៕​