Post News Media ព័ត៌មានជាតិ រថយន្តស៊េរី​ទ...

រថយន្តស៊េរី​ទំនើប​ ស្លាកលេខ​ ភ្នំពេញ​2AL-0989 បើកឆ្លងផ្លូវ​ត្រូវ​រថយន្ត​ក្រុងដឹកអ្នក​ដំណើរក្រុម​ហ៊ុន​ KSO​ បុក​បណ្ដាលឲ្យ​រេចង្កូត​ទៅ​បុក​បង្គោលភ្លើង​

ភ្នំពេញ: រថយន្ត​ក្រុង​ដឹកអ្នក​ដំណើរ​របស់ក្រុម​ហ៊ុន​ KSO មួយ​គ្រឿង​បោះពួយ​យ៉ាង​លឿន​ ទៅ​បុក​រថយន្ត​ស៊េរី​ទំនើប​មួយ​គ្រឿង​ ដែល​បត់ឆ្វេង​ឆ្លង​ផ្លូវ​ ខ្វះការប្រុងប្រយ័ត្ន​ បណ្ដាលឲ្យ​រេចង្កូត​ជ្រុល​ទៅ​បុក​បង្គោលភ្លើង​នៅ​តាម​ចិញ្ចើម​ផ្លូវ​ កាលពីវេលា​ម៉ោង​៧និង២០នាទី​យប់​ថ្ងៃទី​២៦​ ខែកុម្ភ:​ ឆ្នាំ​២០១៩​ ត្រង់ចំណុច​ខាងជើង​សាលាខណ្ឌ​សែនសុខ​ប្រមាណ​៥០ម៉ែត្រ​ តាមបណ្ដោយ​ផ្លូវ​ហាណូយ ​កែងនិងផ្លូវ​១៩៦៦​ ស្ថិតក្នុងសង្កាត់​ភ្នំពេញថ្មី​ ខណ្ឌ​សែនសុខ​។

តាមប្រភពព័ត៌មានពីកន្លែង​កើតហេតុ​ បាន​ឲ្យ​ដឹង​ថា ​នៅមុន​ពេលកើតហេតុ​គេឃើញ​ បុរស​វ័យ​ចំណាស់​ម្នាក់​ បើកបរ​រថយន្ត​ស៊េរី​ទំនើប​មួយ​គ្រឿង​ម៉ាក​ តូយូតា​ហ្វត់ធូន័រ​ ពណ៌​ស​ ពាក់ស្លាកលេខ​ ភ្នំពេញ​2AL-0989 ធ្វើដំណើរតាម​បណ្តោយផ្លូវ​ហាណូយ​ ក្នុង​ទិសដៅ​ពី​ជើងទៅត្បូង​។ លុះមកដល់​ចំណុច​កើតហេតុ ​រថយន្ត​ខាងលើ​ក៏​បាន​បត់​ឆ្វេង​ឆ្លងផ្លូវ​ បំណង​ទៅ​ផ្លូវ​១៩៦៦​ ខ្វះ​ការ​ប្រុងប្រយ័ត្ន​។ ខណ:ដែលបើក​ឆ្លង​ បាន​ពាក់​កណ្តាល​ផ្លូវ​ ស្រាប់​តែ​មាន​រថយន្ត​ក្រុង​ដឹកអ្នក​ដំណើរ​មួយ​គ្រឿង​ទៀត​ម៉ាក​ ហ៊ីយុនដាយ​ ពណ៌​សលាយ​បៃតង​ ជារថយន្ត​៤២កៅអីរបស់​ក្រុម​ហ៊ុន​ KSO ដឹកអ្នក​ដំណើរ​ ពាក់ស្លាកលេខ​ ភ្នំពេញ3C-1886​​ បើកបរ​ដោយ​បុរសម្នាក់ និង​ព្រូម្នាក់​ តាមបណ្ដោយ​ផ្លូវ​ហាណូយ​ មានទិសដៅ​បញ្រ្ចាស​ទិស​គ្នា​ ក្នុង​ល្បឿន​យ៉ាង​លឿន​ រួចក៏​ជ្រុល​ទៅ​បុក​រថយន្ត​ខាងលើចំផ្នែកខាងក្រោយចំហៀង​ខាង​ស្តាំ​ពេញ​ទំហឹង​ បណ្តាល​ឲ្យ​រថយន្ត​ហ្វត់ធូន័រ​ រេចង្កូត​ទៅខាងស្តាំជ្រុល​ទៅ​បុក​បង្គោល​ភ្លើង​មួយ​ដើម​ ដែល​នៅលើចិញ្ចើម​ផ្លូវ​ ត្រង់ចំណុច​ខាងកើត​ បណ្ដាលឲ្យ​រថយន្ត​ហ្វត់ធូន័រ​រងការខូចខាត​ក្រពឹតផ្នែកខាងមុខ​ និង​ចំហៀង​ខាងឆ្វេង​ផ្នែកខាងក្រោយ​យ៉ាង​ដំណំ។ ចំណែក​ឯ​រថយន្តក្រុង​បង្ក​រងការខូចខាត​បែក​កាងខាងមុខ​ចំហៀង​ស្តាំ​ ដោយឡែក​បង្គោលភ្លើង​​​មិនត្រូវបានរងការខូចខាត​នោះទេ​។

ក្រោយ​ពេល​កើត​ហេតុ ​សមត្ថកិច្ច​មូល ​និង​សមត្ថកិច្ច​ជំនាញ​ ​បាន​ចុះមក​ដល់​កន្លែង​កើត​ហេតុ​ ហើយបាន​ឲ្យ​ភាគី​ទាំង​សងខាង​ ធ្វើការ​សម្របសម្រួល​ដោះស្រាយ​គ្នា​ ប៉ុន្តែ​ដោះស្រាយ​គ្នា​មិនត្រូវ​ សមត្ថកិច្ច​ជំនាញ​ក៏​ធ្វើការ​វាស់​វែង ​យករថយន្ត​ទាំង​ពីរ​គ្រឿង​ខាងលើ​ ទៅ​រក្សា​ទុក​នៅ​ការិយាល័យ​ចរាចរណ៍​ផ្លូវ​គោក ​នៃស្នង​ការដ្ឋាន​នគរបាល​រាជធានី​ភ្នំពេញ​ ដើម្បី​រង់ចាំ​ធ្វើ​ការ​ដោះស្រាយ​គ្នា​ ទៅ​តាម​ផ្លូវ​ច្បាប់​នៅ​ពេល​ក្រោយ​៕

Loading...