ភ្នំពេញៈ បុរសម្នាក់ស្រវឹងស្រា បានប្រើហិង្សា វាយនារីជាគូដណ្ដឹង នៅតាមផ្លូវសាធារណៈ ខណៈកំពុងជិះម៉ូតូឌុបគ្នា បង្កឲ្យមានការភ្ញាក់ផ្អើលដល់ប្រជាពលរដ្ឋ ដែលនៅក្បែរនោះ រាយការណ៍ប្រាប់សមត្ថកិច្ច ចុះអន្តរាគមន៍។
ហេតុការណ៍នេះ កើតឡើងនៅវេលាម៉ោង ០៨ និង៣០នាទីយប់ ថ្ងៃទី២៦ ខែកុម្ភៈ ឆ្នាំ២០១៩ ត្រង់ចំណុចទល់មុខឱសថស្ថានតាំងងួនងួន តាមបណ្ដោយផ្លូវជាតិលេខ២ ស្ថិតក្នុងភូមិទួលរកា១ សង្កាត់ចាក់អង្រែក្រោម ខណ្ឌមានជ័យ។
ជនបង្កឈ្មោះ ចេង ប៊ុនលី ភេទប្រុស អាយុ២៨ឆ្នាំ មុខរបរ មន្ត្រីយោធា ជនជាតិខ្មែរ មានទីលំនៅភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្ដាល។ ចំណែកនារីរងគ្រោះឈ្មោះ សុទ្ធ ស្រីពៅ អាយុ២៧ឆ្នាំ ។
ក្រោយទទួលបានដំណឹងភ្លាម សមត្ថកិច្ចបានចុះដល់ទីតាំងកើតហេតុ ហើយភាគីបុរសជាមន្ត្រីយោធា បានធ្វើកិច្ចលើកិច្ចសន្យា ចាប់ពីថ្ងៃនេះតទៅ ឈប់ប្រើអំពើហិង្សាលើឈ្មោះ សុទ្ធ ស្រីពៅ ភេទស្រី អាយុ២៧ឆ្នាំ ត្រូវជាគូដណ្ដឹង ទៅថ្ងៃមុខទៀតឡើយ បើមិនគោរពតាម រូបគេសុខចិត្តទទួលខុសត្រូវចំពោះមុខច្បាប់៕
មតិយោបល់