ភ្នំពេញ: បុរស២នាក់បើករថយន្តមួយគ្រឿង ទៅបុករបាំងថ្មពុះចែកទ្រូងផ្លូវ បណ្ដាលឲ្យរងការខូចខាតទាំងរថយន្ត និងរបាំងថ្មយ៉ាងដំណំ តែសំណាងល្អ មិនបណ្ដាលឲ្យនរណាម្នាក់រងគ្រោះថ្នាក់នោះទេ កាលពីវេលាម៉ោង០២និង៤០ នាទីទៀបភ្លឺឆ្លងចូលថ្ងៃទី០៥ ខែមីនា ឆ្នាំ២០១៩ ស្ថិតនៅតាមបណ្ដោយផ្លូវព្រះមុនី្នវង្ស កែងនិងផ្លូវកម្ពុជាក្រាម ក្នុងសង្កាត់ផ្សារថ្មី១ ខណ្ឌដូនពេញ រាជធានីភ្នំពេញ។
តាមប្រភពព័ត៌មានពីកន្លែងកើតហេតុ បានប្រាប់ឲ្យដឹងថា មុនពេលកើតហេតុគេឃើញ រថយន្តមួយគ្រឿងម៉ាក HYUNDAI ក្បាលពណ៌ខៀវ ពាក់ស្លាកលេខកណ្ដាល3A-0237 បើកបរដោយបុរសម្នាក់ និងអ្នករួមដំណើរម្នាក់ទៀត ធ្វើដំណើរតាមបណ្ដោយផ្លូវព្រះមុន្នីវង្សពីត្បូងមកជើង។ មកដល់ចំណុចកើតហេតុ ស្រាប់តែរថយន្តរេចង្កូតជ្រុលទៅបុករបាំងថ្មពុះចែកទ្រូងផ្លូវ បណ្ដាលឲ្យបាក់ចំនួន២កង់ ចំណែករថយន្តជាប់និងរបាំងពុះចែកទ្រូងផ្លូវ បើកទៅមុខអត់រួច។
ក្រោយកើតហេតុសមត្ថកិច្ចមូលដ្ឋាន បានចុះមកដល់កន្លែងកើតហេតុ ធ្វើការទាក់ទងទៅសមត្ថកិច្ចជំនាញ ដើម្បីឲ្យចុះមកធ្វើការវាស់វែង យករថយន្តទៅរក្សាទុក នៅការិយាល័យចរាចរណ៍ផ្លូវគោក រាជធានីភ្នំពេញ រងចាំដោះស្រាយគ្នា ទៅតាមផ្លូវច្បាប់នៅពេលក្រោយ៕
មតិយោបល់