ភ្នំពេញៈ បុរសវ័យចំណាស់ម្នាក់ ស្រវឹងធ្លាក់ភ្នែក បានបើករថយន្តរេចង្កូតទៅបុកពីក្រោយរថយន្តកូរ៉េដឹកដូងមួយគ្រឿងទៀត ដែលកំពុងឈប់ចតទម្លាក់ដូងឲ្យម៉ូយ នៅលើចិញ្ចើមផ្លូវ ហើយព្យាយាមបើកគេចចេញពីកន្លែងកើតហេតុ កាលពីវេលាម៉ោង១០និង៣០នាទីយប់ ថ្ងៃទី០៤ ខែមីនា ឆ្នាំ២០១៩ ត្រង់ចំណុចខាងមុខផ្ទះលក់ចាប់ហួយមួយកន្លែង ក្បែរនិងតារាងបាល់ទាត់វេស្ទើន តាមបណ្ដោយផ្លូវ១០០៣ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុគេឃើញបុរសវ័យចំណាស់ម្នាក់ បើករថយន្តមួយគ្រឿងម៉ាក តូយូតាព្រូស ពណ៌ស ពាក់ស្លាកលេខ ភ្នំពេញ2AU-9970 ធ្វើដំណើរពីជើងទៅត្បូងក្នុងស្ថានភាពស្រវឹងជោកជាំ តាមបណ្ដោយផ្លូវ១០០៣ ក្នុងល្បឿនលឿន។
មកដល់ចំណុចកើតហេតុរថយន្តខាងលើ បានរេចង្កូតទៅខាងស្តាំបុកចំពីក្រោយរថយន្តកូរ៉េមួយគ្រឿងទៀតម៉ាក KIA ពណ៌ខៀវ ដឹកដូង ពាក់ស្លាកលេខ ភ្នំពេញ2AI-8006 កំពុងឈប់ចតទម្លាក់ផ្លែដូងនៅលើចិញ្ចើមផ្លូវត្រង់ចំណុចខាងលើ បណ្ដាលឲ្យបែកចង្កៀង និងក្រពឹតផ្នែកខាងក្រោយ ចំណែកឯរថយន្តបង្ក បានរងការខូចខាតក្រពឹតផ្នែកខាងមុខចំហៀងខាងស្តាំយ៉ាងដំណំ។
ភ្លាមៗនោះ រថយន្តបង្កមិនបានឈប់ចុះមកធ្វើការដោះស្រាយគ្នាទេ បែរជាព្យាយាមបើករថយន្តគេចចេញពីកន្លែងកើតហេតុ តែក៏ត្រូវបានប្រជាពលរដ្ឋដែលឃើញហេតុការណ៍ បានជួយជិះម៉ូតូកង់បីដេញពីក្រោយរហូតដល់ខាងមុខបណ្ណាល័យហ៊ុនសែន តាមបណ្ដោយផ្លូវ៥៩៨ ស្ថិតក្នុងសង្កាត់ទឹកថ្លា ទើបអាចស្ទាក់ជាប់។
ក្រោយពេលកើតហេតុ សមត្ថកិច្ចមូលដ្ឋាន និងសមត្ថកិច្ចជំនាញក៏បានចុះមកដល់កន្លែង ហើយបានឲ្យភាគីទាំងពីរធ្វើការសម្របសម្រួលគ្នា តែដោយភាគីខាងរថយន្តរងគ្រោះ មិនចង់មានរឿងរ៉ាវវែងឆ្ងាយ ក៏ព្រមយករថយន្តទៅជួសជុលដោយខ្លួនឯង បញ្ចប់រឿងកន្លែងកើតហេតុតែម្ដង៕
មតិយោបល់