ភ្នំពេញៈ បុរសជាជនជាតិចិនម្នាក់ បើករថយន្តមួយគ្រឿង បោះពួយយ៉ាងលឿន ខណៈមកដល់ផ្លូវកោងមិនប្រយ័ត្ន ក៏ជ្រុលទៅបុករបាំងថ្មពុះចែកទ្រូងផ្លូវ បណ្តាលឲ្យរថយន្តរងការខូចខាត ទៅមុខលែងរួច កាលពីវេលាម៉ោង២និង៣០នាទីរំលងអធ្រាត្រឈានចូលថ្ងៃ០៥ ខែមីនា ឆ្នាំ២០១៩ ត្រង់ចំណុចខាងមុខផ្ទះសំណាក់កោះមាស តាមបណ្ដោយផ្លូវ២៧១ ស្ថិតក្នុងសង្កាត់បឹងសាឡាង ខណ្ឌទួលគោក។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញបុរសជនជាតិចិនម្នាក់ បានបើករថយន្តមួយគ្រឿងម៉ាក តូយូតាតាកូម៉ា ពណ៌ស ពាក់ស្លាកលេខ ភ្នំពេញ2AD-3840 ធ្វើដំណើរពីស្ពានអាកាសស្ទឹងមានជ័យ ឆ្ពោះទៅវិទ្យាល័យជាស៊ីមសាមគ្គី តាមបណ្តោយផ្លូវ២៧១ ក្នុងល្បឿនយ៉ាងលឿន។
មកដល់ចំណុចកើតហេតុ ផ្លូវមានស្ថានភាពកោង គួបផ្សំនឹងមានប្រជាពលរដ្ឋបានចាក់ទឹកសាប៊ូបង្ហៀរទៅលើផ្លូវ រួមទាំងបើកបរខ្វះការប្រុងប្រយ័ត្នថែមទៀតនោះ ទើបបណ្ដាលឲ្យរថយន្តជ្រុលចង្កូតទៅបុកនិងរបាំងថ្មពុះចែកទ្រូងផ្លូវ បាក់អស់បីកង់ ចំណែកឯរថយន្តវិលមួយជុំទៅទទឹងផ្លូវរងការខូចខាតក្រពឹតផ្នែកខាងមុខយ៉ាងដំណំ ទៅមុខលែងរួច ប៉ុន្តែមិនបង្កឲ្យមាននរណាម្នាក់រងរបួសនោះទេ។
ក្រោយពេលកើតហេតុសមត្ថកិច្ចមូលដ្ឋាន បានចុះមកដល់កន្លែងកើតហេតុ ហើយក៏បានទាក់ទងទៅសមត្ថកិច្ចជំនាញ មកធ្វើការវាស់វែង និងស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយតាមផ្លូវច្បាប់ពេលក្រោយ៕
មតិយោបល់