កណ្ដាលៈ យុវជន៣នាក់បើកម៉ូតូក្នុងសា្ថនភាពស្រវឹងស្រាទៅបុកសួនច្បារពុះចែកទ្រូងផ្លូវពេញទំហឹងបណ្ដាលឲ្យស្លាប់ និងរងរបួសធ្ងន់ស្រាលបង្កឲ្យមានការភ្ញាក់ផ្អើល នៅវេលាម៉ោង​ ៤ទៀបភ្លឺថ្ងៃទី០៦ ខែមិនា ឆ្នាំ២០១៩ ស្ថិតត្រង់ចំណុចផ្លូវជាតិលេខ៦ ចន្លោះគីឡូមែត្រលេខ ៣២-៣៣ ក្នុងភូមិវត្តថ្មី ឃុំព្រែកដំបង ស្រុកមុខកំពូល ខេត្តកណ្តាល ។

នៅមុនពេលកើតហេតុ គេបានឃើញ​ម៉ូតូម៉ាក Honda C125 ពណ៌ខ្មៅ ពាក់ស្លាកលេខ​ កណ្ដាល1J-4287 ធ្វើដំណើរមា​នគ្នា ៣នាក់ បើកបរតាម​បណ្ដោយផ្លូវ​ជាតិលេខ៦ ពីជើងទៅត្បូង ក្នុងល្បឿនលឿន លុះមកដល់ចំណុច​កើតហេតុ ក៏បានរេចង្កូត​ទៅបុកសួនច្បារពុះចែកទ្រូ​ងផ្លូវពេញ​ទំហឹង បណ្ដាលឲ្យដួល​ទៅបោកក្បាល​ជាមួយផើងផ្កា​សួនច្បារស្លាប់ភ្លាមៗ​ នៅកន្លែងកើតហេតុ រីឯអ្នករួម​ដំណើររងរបួសធ្ងន់ម្នាក់ និងស្រាលម្នាក់។

ប្រភពពីកន្លែងកើតហេតុបាន​ឲ្យដឹងថា ជនរងគ្រោះ​ឈ្មោះ ធី យ៉ា ភេទប្រុស អាយុ ១៩ឆ្នាំ ស្លាប់ រស់នៅ​ភូមិអន្លុងជ្រៃ ឃុំច្បារអំពៅ ស្រុកបាធាយ រួម​ដំណើរជាមួយឈ្មោះ ថា ភេទប្រុស អាយុ ២០ឆ្នាំ មានទីលំនៅ ឃុំព្រែករំសេវ ស្រុកស្រីសន្ធរ របួសធ្ងន់ និងឈ្មោះ ស៊្រុន ធារ៉ា ភេទប្រុស អាយុ ២១ឆ្នាំ នៅភូមិអន្លុងជ្រៃ ឃុំច្បារអំពៅ ស្រុកបាធាយ ខេត្តកំពង់ចាមជាមួយគ្នារបួសស្រាល។

ក្រោយពី​ហេតុសមត្ថកិច្ចបានឲ្យដឹងថា ជនរងគ្រោះរបួស​ធ្ងន់និងស្រាលត្រូវបាន​ឡានពេទ្យដឹកទៅ​សង្រ្គោះនៅមន្ទីរពេទ្យ ចំណែកសព​ជនរងគ្រោះត្រូវបាន​ប្រគល់ទៅ​ឲ្យក្រុមគ្រួសារ​យកទៅធ្វើបុណ្យ រីឯវត្ថុតាងនៅកន្លែងកើតហេតុត្រូវបានប៉ូលិសធ្វើការវាស់វែង យកទៅរក្សាទុក​នៅអធិការដ្ឋាន​នគរបាលស្រុក ដើម្បីចាត់ការទៅតាមនីតិវិធីច្បាប់ ៕