ភ្នំពេញៈ នៅវេលាម៉ោង ១២ និង១០នាទីរំលងអធ្រាត្រឈានចូលថ្ងៃទី១១ ខែមិនា​ ឆ្នាំ២០១៩ មានករណីហិង្សាដោយចេតនា នៅក្នុងបុរីហុក ឆេង ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។

ជនរងគ្រោះឈ្មោះ ក ខ គ អាយុ ២៥ឆ្នាំ មុខរបរ អ្នកលក់ស្រាបៀរ រស់នៅខេត្តស្វាយរៀង។

តាមសម្ដីជនរងគ្រោះ បានប្រាប់សមត្ថកិច្ចថា ជនបង្កជាសង្សារខ្លួន មានខ្សែអ្នកធំ មិនអាចយកឈ្នះគេបានទេ តែមិនបានបញ្ជាក់អត្តញ្ញាណនោះទេ គ្រាន់តែប្រាប់មុខរបរ ជាមន្ត្រីអាវុធហត្ថក្រុងភ្នំពេញ អាយុ ២៧ឆ្នាំ។

មូលហេតុ៖ ស្រវឹងស្រា ទាស់ពាក្យសម្ដីគ្នា ឈានដល់ការប្រើហិង្សា បង្ករបួសស្នាម។

កន្លងមកជនរងគ្រោះ និងជនបង្ក ធ្លាប់មានជម្លោះគ្នាជាហូរហែ តែទើបតែមានរឿងជាមួយគ្នាចុងក្រោយនេះ ជនរងគ្រោះបានមកដាក់ពាក្យបណ្ដឹង។

ក្រោយកើតហេតុជនរងគ្រោះ បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលដង្កោ ដើម្បីចាត់ការតាមនិតិវិធីច្បាប់៕ ហាមលួចអត្ថបទ និងរូបភាពចម្លងដោយគ្មានការអនុញ្ញាត