ផ្ទះ ព័ត៌មានជាតិ ប្ដីប្រពន្ធពី...

ប្ដីប្រពន្ធពីរនាក់ ជិះ​ម៉ូតូ​ចេញពីធ្វើការ​ ត្រូវចោរ​ឆក់​កាបូបសម្រេច បណ្តាលឲ្យ​រងរបួស នៅខណ្ឌ​ទួលគោក

0

ភ្នំពេញ:​ ប្តី​ប្រពន្ធ​ពីរនាក់ បានជិះ​ម៉ូតូ​ឌុបគ្នា​ ត្រលប់មកពី​កន្លែងធ្វើការ​ ​ត្រូវ​បាន​ក្រុម​ចោរ​ធ្វើសកម្ម​ភាពឆក់​កាបូប​បាន​សម្រេច​ រួចជិះ​រត់​គេច​ខ្លួន​បាត់​ស្រមោល​ កាលពីវេលា​ម៉ោង​១០យប់​ថ្ងៃ​ទី​១២​ ខែមិនា​ ឆ្នាំ​២០១៩​ត្រង់ចំណុចក្បែរមន្ទីរពេទ្យ​ព្រះកុសុម:​​ តាមបណ្ដោយ​ផ្លូវ​១៥៦ កែង​និង​​ផ្លូវ​២៦៥​ ស្ថិតក្នុងសង្កាត់​ទឹកល្អក់​ទី​២​ ខណ្ឌ​ទួលគោក​។

តាមសម្តីពី​ជនរងគ្រោះ​ទាំង​ពីរ​នាក់​ សុំមិន​បញ្ចេញ​ឈ្មោះ​ បានប្រាប់​ឲ្យ​ដឹង​ថា​ នៅ​មុន​ពេល​កើត​ហេតុ​ ពួកគាត់ ​បាន​ជិះ​ម៉ូតូ​មួយ​គ្រឿង​ម៉ាក​ ស៊ុយស័រគីស្មាក់រេវ៉ូ​ ពណ៌​ក្រហម​ ពាក់ស្លាកលេខ​ ភ្នំពេញ​1BZ-5669 ​ធ្វើដំណើរដឹកគ្នាពី​កើត​ទៅ​លិច​ចេញ​ពី​កន្លែង​ធ្វើការ​ នៅ​ម្តុំ​ខាងក្រោយ​ព្រះបរមរាជវាំង​ បំណង​​ត្រលប់ទៅ​ផ្ទះ​វិញ​នៅ​ម្តុំ​ទឹកថ្លា​ តាមបណ្ដោយ​ផ្លូវ​លេខ១៥៦​។

លុះមកដល់​ចំណុច​កើតហេតុ​ ក៏​មាន​រថយន្ត​កុងតឺន័រ​មួយគ្រឿង ​បានបើក​បត់​ឆ្លងផ្លូវ​នៅ​ខាង​មុខ​ ខណ:​នោះ​ ជនរងគ្រោះ​ ក៏​បាន​បន្ថយ​ល្បឿន​ម៉ូតូ​បម្រុង​ឈប់​ ស្រាប់​តែ​លេច​មុខ​ក្រុម​ជនសង្ស័យ​ចំនួន​ពីរ​នាក់ ​ជិះម៉ូតូមួយ​គ្រឿង​ម៉ាក​ MSX មិនចាំស្លាកលេខ​ ជិះមកពី​ក្រោយ​ម៉ូតូ​របស់​ជនរងគ្រោះ​ រួច​ធ្វើ​សកម្មភាព​ឆក់កាបូប​ពីជន​រងគ្រោះ​ជាប្រពន្ធ ដែល​កាន់​ក្តោប​ដាក់​ពីមុខ​បាន​សម្រេច ​បណ្តាលឲ្យ​ជនរងគ្រោះ​ធ្លាក់​ពី​លើ​ម៉ូតូ​រង​របួស​ស្រា​ល​ ចំណែកឯ​ជនសង្ស័យ​បាន​បន្ថែម​ល្បឿន ​បើករត់​គេច​ខ្លួន​បាត់​ស្រមោល​ដោយ​សុវត្ថិភាព​​។

ភ្លាមៗ​នោះ​ជនរងគ្រោះ​ជា​ប្តី​ បានព្យាយាម​បើក​ម៉ូតូ​ដេញ​តាម​ក្រុម​ជនសង្ស័យ ​និង​ស្រែក​ថា​ ចោរ​ៗ​ ឲ្យគេឯង​ជួយ តែ​ជិះ​ដេញ​មិន​ទាន់​ក្រុម​ជនសង្ស័យ​នោះទេ​។

​សម្ភារបាត់បង់នៅក្នុង​កាបូប​របស់​ជនរងគ្រោះ ​ដែល​ត្រូវ​ក្រុម​ជនសង្ស័យ​ធ្វើសកម្មភាព​ឆក់​យក​ទៅ​មាន​៖ លុយ​ដុល្លារ​ជិត​៥០ដុល្លារ​ ​អត្តសញ្ញាណប័ណ្ណ​មួយ​សន្លឹក​ និង​សម្ភារ:​មួយ​ចំនួន​ទៀត​។

ក្រោយ​ពេលកើតហេតុ​ជនរងគ្រោះ​ទាំង​ពីរ​ប្តី​ប្រពន្ធ ​បាន​ដឹក​គ្នា​ទៅ​ដាក់​ពាក្យ​បន្តឹង​នៅ​ប៉ុស្តិ៍​នគរបាល​រដ្ឋ​ទឹកល្អក់​ទី​២ ​ដើម្បី​ឲ្យ​សមត្ថកិច្ច​ ធ្វើការ​ស្រាវជ្រាវ​វែកមុខ​ជន​សង្ស័យ ​យក​មក​ផ្តន្ទា​ទោស​ទៅ​តាម​ផ្លូវ​ច្បាប់​៕

Loading...

Leave a Reply

This site uses Akismet to reduce spam. Learn how your comment data is processed.