ភ្នំពេញៈ យុវជន២នាក់ចេញពីក្លឹបកំសាន្ដមួយកន្លែង ត្រូវយុវជនមួយក្រុមទៀតដេញវាយប្រហារតាមបណ្ដោយផ្លូវ២៧១ ស្ថិតក្នុងខណ្ឌចំការមន ត្រូវសមត្ថកិច្ចល្បាតប្រទះឃើញ ក៏ដេញតាមឃាត់ខ្លួនជនសង្ស័យទាំង២នាក់ កាលពីវេលាម៉ោង២និង១០នាទីយប់រំលងអាធ្រាត្រ ឈានចូលថ្ងៃទី១០ ខែកក្កដា ឆ្នាំ២០១៦ នៅបណ្ដោយផ្លូវលេខ២១១ កែងផ្លូវ១៤៦ ស្ថិតក្នុងសង្កាត់វាលវង់ ខណ្ឌ៧មករា។

តាមប្រភពពីកន្លែងកើតហេតុបានឲ្យដឹងថា យុវជន២នាក់ បានចេញពីក្លឹបកំសាន្តមួយកន្លែង ត្រឡប់មកផ្ទះវិញក៏ស្រាប់តែមានក្មេងស្ទាវមួយក្រុមជិះវាយយុវជនទាំង២នាក់នោះ រួចយុវជនទាំង២នាក់នោះព្យាយាមជិះគេច ក៏ប្រទះនិងសមត្ថកិច្ចខណ្ឌចំការមនកំពុងតែធ្វើការល្បាត ក៏ដេញឃាត់ខ្លួនយុវជនទាំង២នាក់នោះ តែយុវជនទាំង២នោះមិនព្រមឈប់នោះទេ ថែមទាំងបន្ថែមល្បឿនព្យាយាមគេចពីសមត្ថកិច្ច ធ្វើឲ្យសមត្ថកិច្ចមានការសង្ស័យ ក៏ធ្វើការដេញតាមឃាត់ខ្លួនរហូតមកដល់ ចំណុចម្តុំបុរីកីឡា ដែលស្ថិតក្នុងខណ្ឌទួលគោក បង្កការភ្ញាក់ផ្អើលដល់សមត្ថកិច្ចខណ្ឌទួលគោក ចេញដេញឃាត់ខ្លួនយុវជនទាំង២នាក់ភ្លាមៗដែរ តែដោយសារតែយុវជនទាំង២នាក់នោះអស់ផ្លូវគេចខ្លួនក៏ត្រូវសមត្ថកិច្ចក្របួចជាប់ដដែល។

ក្រោយពេលកើតហេតុ ដោយសារតែកន្លែងកើតហេតុនេះ ស្ថិតក្នុងទឹកដីខណ្ឌចំការមន ទើបសមត្ថកិច្ចខណ្ឌទួលគោកប្រគល់ឲ្យសមត្ថកិច្ចខណ្ឌចំការមនយកទៅធ្វើការសួរនាំ នៅអធិការដ្ឋាននគរបាលខណ្ឌចំការមន៕