ភ្នំពេញ: ករណីគ្រោះថ្នាក់ចរាចរណ៍ រថយន្តតូយូតាតាកូម៉ាមួយគ្រឿង ដឹកគ្នាជាច្រើននាក់ បោះពួយយ៉ាងលឿន មិនប្រយ័ត្នក៏ជ្រុលចង្កូត ទៅបុកក្បាលព្រួញពុះចែកទ្រូងផ្លូវពេញទំហឹងទៅមុខលែងរួច កាលពីវេលាម៉ោង១០ និង៤០នាទីយប់ ថ្ងៃទី១៧ ខែមិនា ឆ្នាំ២០១៩ ត្រង់ចំណុចខាងមុខអាកាសយានដ្ឋាន ភ្នំពេញអន្តរជាតិពោធិ៍ចិនតុង តាមបណ្ដោយមហាវិថីសហព័ន្ធរុស្ស៊ី ស្ថិតក្នុងសង្កាត់កាកាបទី១ ខណ្ឌពោធិ៍សែនជ័យ។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនកើតហេតុ គេឃើញរថយន្តមួយគ្រឿងម៉ាក តូយូតាតាកូម៉ា ពណ៌សំបកឪឡឹក ពាក់ស្លាកលេខ ភ្នំពេញ2K-2232 រួមដំណើរដោយមនុស្សប្រុសស្រី៦ទៅ៧នាក់ ធ្វើដំណើរពីត្បូងទៅជើង តាមបណ្តោយមហាវិថីសហព័ន្ធរុស្ស៊ី ក្នុងល្បឿនលឿន។
មកដល់ចំណុចកើតហេតុ រថយន្តបង្កខាងលើ បានជ្រុលចង្កូតទៅខាងឆ្វេងដៃ បុកក្បាលព្រួញពុះចែកទ្រូងផ្លូវពេញទំហឹង បណ្ដាលឲ្យបាក់អស់មួយកង់ខ្ទាតទៅផ្លូវម្ខាងទៀត។ ចំណែកឯរថយន្តបង្ក បានរងការខូចខាតក្រពឹតកាង និងដាច់ក្រឡេកង់មុខចំហៀងខាងឆ្វេង ទៅមុខលែងរួច ប៉ុន្តែមិនបានបង្កឲ្យមាននរណាម្នាក់រងរបួសនោះទេ។ ភ្លាមៗនោះអ្នកបើកបររថយន្ត និងអ្នករួមដំណើរជាមួយ ក៏បាននាំគ្នាជិះម៉ូតូកង់បីចាកចេញពីកន្លែងកើតហេតុបាត់ទៅ។
ក្រោយពេលកើតហេតុ សមត្ថកិច្ចមូលដ្ឋានក៏បានចុះមកដល់កន្លែងកើតហេតុ ហើយទាក់ទងទៅសមត្ថកិច្ចជំនាញ ដើម្បីឲ្យចុះមកធ្វើការវាស់វែង និងស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញរង់ចាំធ្វើការដោះស្រាយតាមផ្លូវច្បាប់ពេលក្រោយ៕
មតិយោបល់