ស្វាយរៀង: កាលពីវេលាម៉ោង៣និង៣០នាទីរសៀល ថ្ងៃទី១៧ ខែមិនា ឆ្នាំ២០១៩ មានករណីគ្រោះថ្នាក់ចរាចរណ៍ ដោយបុរសម្នាក់ស្លាប់ភ្លាមៗនៅក្រោមរថយន្ត និង២នាក់ទៀតបានរងរបួសធ្ងន់ធ្ងរ បន្ទាប់ពីរថយន្តទេសចរណ៍ដឹកអ្នកដំណើរក្រឡាប់ផ្ងារជើង សង្កត់ទៅលើអ្នកជិះម៉ូតូឌុបគ្នា នៅលើកំណាត់ផ្លូវជាតិលេខ១ ស្ថិតនៅភូមិត្រពាំងផ្លុង សង្កាត់បាទី ក្រុងបាវិត ខេត្តស្វាយរៀង។
សមត្ថកិច្ច បានឲ្យដឹងថា មុនពេលកើតហេតុ គេឃើញបុរសម្នាក់ ជិះម៉ូតូពីលិចទៅកើតឌុបគ្នា២នាក់ផ្សេងទៀត មកដល់ចំណុចកើតហេតុ ស្រាប់តែរថយន្តក្រុង ដែលបើកស្របទិសគ្នា បានវ៉ាម៉ូតូជនរងគ្រោះ មិនដឹងថាជាយ៉ាងម៉េចនោះទេ ក៏រេចង្កូតក្រឡាប់ផ្ងារជើងឡើងលើ ដោយរថយន្តសង្កត់ទៅលើជនរងគ្រោះទាំង៣នាក់ ដែលកំពុងជិះម៉ូតូស្លាប់ភ្លាមៗ នៅក្រោមរថយន្តម្នាក់ និង២នាក់ទៀតរបួសធ្ងន់។
ជនរងគ្រោះមិនទាន់ស្គាល់អត្តសញ្ញាណទេ ត្រូវសមត្ថកិច្ចហៅរថយន្តសាមុយដឹកមកកាន់មន្ទីរពេទ្យបង្អែកជីភូ ដើម្បីសង្គ្រោះ។ ចំណែកសពសមត្ថកិច្ច បានទាញចេញពីក្រោមរថយន្ត និងប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី។
ក្រោយកើតហេតុរថយន្តបង្ក សមត្ថកិច្ច បានហៅរថយន្តស្ទូចឡើងយកទៅរក្សាទុកនៅការិយាល័យនគរបាលចរាចរណ៍នៃស្នងការដ្ឋាននគបាលខេត្ត៕
មតិយោបល់