ព័ត៌មានជាតិ

បុរសម្នាក់ជិះម៉ូតូ បុករថយន្តខូចចតនៅចិញ្ចើមផ្លូវ រងរបួសបាក់ភ្លៅ

បន្ទាយមានជ័យ:​ កាលពីវេលាម៉ោង​ ៨ និង ២៥នាទីយប់ថ្ងៃទី ១៧​ ខែមិនា​ ឆ្នាំ២០១៩​ មានករណីគ្រោះថ្នាក់ចរាចរណ៍ រវាងម៉ូតូបុករថយន្តឈប់ចតលើទ្រូងផ្លូវ បណ្ដាលឲ្យរងរបួសធ្ងន់បាក់ភ្លៅស្ដាំ ស្ថិតលើផ្លូវជាតិលេខ៥៦A ត្រង់ចំណុចផ្លូវកោងខាងត្បូងដីឡូតិ៍ភូមិស្ទឹង ឃុំរលួស ស្រុកស្វាយចេក ខេត្តបន្ទាយមានជ័យ។

អធិការនគរបាលស្រុកស្វាយចេក បានឲ្យដឹងថា មុខពេលកើតហេតុ គេឃើញមានម៉ូតូ១គ្រឿង ម៉ាក ហុងដាឌ្រីម C125 ពណ៌ខ្មៅ​ ស៊េរីឆ្នាំ២០១៧​ ពាក់ស្លាកលេខ​ 1Q-1929 បើកបរដោយឈ្មោះ សេក ទ្រី ភេទប្រុស អាយុ ២៧ឆ្នាំ​ នៅភូមិទ្រាស ឃុំទ្រាស ស្រុកស្វាយចេក ខេត្តបន្ទាយមានជ័យ បានជិះម៉ូតូពីជើងទៅត្បូង​ មកដល់ចំណុចកើតហេតុ ក៏បុករថយន្តខូចចតលើទ្រូងផ្លូវពីក្រោយ បណ្ដាលឲ្យរងរបួសធ្ងន់ បាក់ភ្លៅខាងស្តាំ។

រថយន្តម៉ាក កាមរី ពណ៌ខ្មៅ​ ស៊េរីឆ្នាំ១៩៩១​ ពាក់ស្លាកលេខ​ ​ភ្នំពេញ 2F-4909 អ្នកបើកបររថយន្តឈ្មោះ វ៉ាន់ ចាន់វី (ហៅឈិត) ភេទប្រុស​ អាយុ ៣៦ឆ្នាំ​ នៅភូមិខ្លាកូនចាស់ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ​ (រងការខូចចតក្បាលបែរទៅទិសខាងត្បូង)។

មូលហេតុ៖ បណ្តាលមកពីរថយន្តកាមរីខូចចតលើទ្រូងផ្លូវ ប្រើភ្លើងសញ្ញាមិនបានគ្រប់គ្រាន់ អ្នកបើកម៉ូតូមើលមិនច្បាស់ ក៏បុកបណ្តាលឲ្យកើតមានគ្រោះថ្នាក់តែម្តង ។​

ក្រោយកើតហេតុ ជនរងគ្រោះត្រូវបានបងប្អូនដឹក យកទៅព្យាបាលនៅមន្ទីរពេទ្យ ចំណែកវត្ថុតាង កម្លាំងនគរបាលជំនាញ បានយកមករក្សាទុកនៅអធិការដ្ឋាន រងចាំដោះស្រាយពេលក្រោយ៕

មតិយោបល់