ភ្នំពេញ: កាលពីវេលាម៉ោង១០ព្រឹកថ្ងៃទី១៨ ខែមិនា ឆ្នាំ ២០១៩ មានករណីកម្មករលីសែងដែក បានរងរបួសធ្ងន់ ខណ:កំពុងរៀបស្ទូចដែកចូលឃ្លាំង ស្រាប់តែដាច់ខ្សែដែកធ្លាក់សង្កត់ ស្ថិតតាមបណ្តោយផ្លូវចម្ការដូង មុខឃ្លាំងដែកយីហោ សេង សុជាតិ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។
តាមសាក្សីពីកន្លែងកើតហេតុ បានដឹងថា មុខពេលកើតហេតុ គេឃើញរថយន្តកូរ៉េធុនធំមួយគ្រឿង មានដងស្ទូច ដឹកដែកពេញរថយន្ត បើកតាមបណ្តោយផ្លូវចម្ការដូង មកឈប់នៅមុខឃ្លាំងលក់គ្រឿងសំណង់យីហោ សេង សុជាតិ បំណងទម្លាក់ដែកចូលទៅឃ្លាំង ពេលនោះកម្មករ៤ទៅ៥នាក់ បានស្រាយខ្សែចេញ ដើម្បីស្ទូចយកដែក ប៉ុន្តែទំនងជាខុសបច្ចេកទេស ស្រាប់តែដែកមួយបាច់ធំបានរមិលធ្លាក់សង្កត់ទៅយុវជនម្នាក់ ដែលនៅចំហៀងរថយន្ត បណ្តាលឲ្យបែកក្បាលសន្លប់ឈឹង ត្រូវបានក្រុមកម្មករនាំគ្នា ជួយលើក និងដឹកយកទៅសង្គ្រោះភ្លាមៗនៅមន្ទីរពេទ្យ។
ក្រោយកើតហេតុម្ចាស់ឃ្លាំង បានព្យាយាមបិទបាំងព័ត៌មាន មិនសហការជាមួយសមត្ថកិច្ចឡើយ ដោយបង្ខំឲ្យតៃកុងរថយន្ត បើករថយន្តដឹកដែកចេញពីមុខឃ្លាំងខ្លួន ព្រោះខ្លាចជាប់ពាក់ព័ន្ធនឹងករណីធ្លាក់ដែក បណ្តាលឲ្យមានមនុស្សរងរបួស។
យ៉ាងណាមិញពាក់ព័ន្ធនឹងករណីនេះ សមត្ថកិច្ច បានតាមចាប់ឃាត់តៃកុង និងរថយន្តដឹកដែកទុក ដើម្បីរង់ចាំដោះស្រាយ ជាមួយនឹងយុវជនដែលរងរបួសផងដែរ៕
មតិយោបល់