ព័ត៌មានជាតិ

ម៉ូតូ​ពីរគ្រឿងបុកគ្នា រួចបង្កហិង្សា​ ត្រូវ​​សមត្ថកិច្ច​ឃាត់​យកទៅប៉ុស្តិ៍

ភ្នំពេញ: បុរស​ពីរ​បាន​រងរបួស​បែក​ក្បាល ​បន្ទាប់​ពី​ជិះ​ម៉ូតូ​បុកគ្នាពេញទំហឹង​ រួចក៏ទាស់សម្ដីគ្នា ក៏កើតជាហិង្សា​វាយគ្នា បង្ក​ឲ្យ​មានការ​ភ្ញាក់ផ្អើល​ដល់​សមត្ថកិច្ច​ ចុះ​មក​អន្តរាគមន៍​កាលពីវេលាម៉ោង​១និង២០នាទី​យប់​ថ្ងៃ​ទី​១៨​ ខែមិនា​ ឆ្នាំ​២០១៩ ត្រង់ចំណុច​មុខ​ស្ថានីយ​ប្រេង​ឥន្ធន:​ លីម​ ឡុង​ តាមបណ្តោយផ្លូវ​សម្តេច​ ជាស៊ីម​ កែងនិងផ្លូវ​២០១១​ ស្ថិត​ក្នុង​សង្កាត់​គោកឃ្លាង​ ខណ្ឌសែនសុខ​។

តាមប្រភព​ព័ត៌មាន​ពី​កន្លែង​កើត​ហេតុ​ បាន​ឲ្យ​ដឹង​ថា ​នៅ​មុន​ពេល​កើត​ហេតុ​ គេឃើញ​បុរស​ម្នាក់​ ជិះម៉ូតូ​មួយ​គ្រឿង​ម៉ាក​ ស៊ុយស័រគីលែត​ ពណ៌ស​ ពាក់ស្លាកលេខ​ ព្រៃវែង​1M-9718 ​និងមាន​បក្ខពួក​បី​អ្នក​ផ្សេង​ទៀត​ ជិះ​ម៉ូតូពីរគ្រឿងមិនចាំ​ម៉ាក​ ដោយពួកគរទើប​តែ​ចេញ​មក​ពីកម្មវិធី​ខួបកំណើត​មិត្តភក្ដិ​ នៅ​ម្តុំ​វត្ត​សំរោង​អណ្ដែត​ ​បំណង​ជិះ​ត្រលប់ទៅ​ផ្ទះ​វិញ​ នៅ​ក្បែរ​កន្លែង​កើត​ហេតុ​ ដោយ​ធ្វើដំណើរ​ពី​ត្បូង​ទៅ​ជើង ក្នុង​ស្ថានភាពស្រវឹង​ តាមបណ្ដោយ​ផ្លូវ​២០១១​​​។ បន្ទាប់​មក​ម៉ូតូ​ខាងលើ ​ក៏​បាន​បើក​ឆ្លង​កាត់​ផ្លូវ​សម្តេច ជាស៊ីម​ ខណ:​នោះ​ក៏​ស្រាប់តែមាន​ម៉ូតូ​មួយ​គ្រឿង​ទៀត​ម៉ាក​ ហុងដាឌ្រីម​ ស៊េរី​០១៧​ ពណ៌ខ្មៅ​ ពាក់ស្លាកលេខ​ ភ្នំពេញ​1GH-8518 បើកបរ​ដោយ​បុរស​ម្នាក់ ​ក្នុង​ស្ថានភាព​ស្រវឹងដូចគ្នា​ តាមបណ្ដោយ​ផ្លូវ​សម្តេច​ជាស៊ីម​ ធ្វើដំណើរពី​កើត​ទៅ​លិច​ ​ក្នុង​ល្បឿនលឿន​។ មកដល់ចំណុច​កើត​ហេតុ​ ក៏​បានបត់ឆ្វេង​បម្រុង​ឆ្ពោះទៅផ្លូវ​២០១១​ មិនប្រយ័ត្ន​​ក៏​ជ្រុល​ទៅ​បុក​ម៉ូតូ​លែត​ ចំ​ពាក់​កណ្ដាល​ពេញទំហឹង បណ្ដាល​ឲ្យ​ម៉ូតូ​លែត​រងការខូចខាត​បន្តិចបន្តួច​រីឯអ្នក​បើក​បរ​រងរបួស​ស្រាល​ ចំណែកឯ​ម៉ូតូ​ឌ្រីម​រងការខូចខាត​វៀចបូម​ខាង​មុខ​។

ប្រភពដដែល​បាន​បន្ត​ថា ​​ភាគី​ទាំង​ពីរ​​បាន​ជជែក​វែកញែក​រកខុសរកត្រូវរៀងៗខ្លួន​យ៉ាង​តឹង​សរសៃ​កដាក់​គ្នា​ទៅ​វិញ​ទៅ​មក​រហូត​កើត​មាន​ជម្លោះ​ឈានដល់​ប្រើហិង្សា​ដាក់គ្នា។ ​

ក្រោយ​ពេលកើតហេតុ​ភាគីទាំងសងខាង ​ត្រូវបាន​សមត្ថកិច្ច​ធ្វើការ​នាំ​ខ្លួន​យក​ទៅ​សាក​សួរ​នាំ​ នៅ​ឯ​អធិការ​ដ្ឋាន​នគរបាល​ខណ្ឌ​សែនសុខ​ ដើម្បី​រង់ចាំ​ធ្វើ​ដោះស្រាយ​គ្នា​ទៅ​ផ្លូវ​ច្បាប់​​ពេល​ក្រោយ​៕

មតិយោបល់