ព្រះវិហារ: យោងតាមផេកអគ្គនាយកដ្ឋានកាំកុងត្រូល នៅថ្ងៃទី១០ ខែមេសា ឆ្នាំ២០១៩ មន្រ្តីសាខាកាំកុងត្រូលខេត្តព្រះវិហារ ដោយមានការសហការពីមន្ត្រីមន្ទីរពាណិជ្ជកម្មខេត្ត និងអាជ្ញាធរដែនដី បានចុះត្រួតពិនិត្យ និងផ្សព្វផ្សាយអំពីគុណភាព សុវត្ថិភាពម្ហូបអាហារ ដែលមានដាក់តាំងលក់នៅផ្សារភ្នំដែក ក្នុងភូមិភ្នំដែក ឃុំរមណីយ ស្រុករវៀង ខេត្តព្រះវិហារ។ ក្នុងសកម្មភាពនេះ មន្ត្រីជំនាញ បានធ្វើការត្រួតពិនិត្យរកភាពមិនអនុលោម នៅលើសំបកវេចខ្ចប់ផលិតផលម្ហូបអាហារផងដែរ។

ជាលទ្ធផលមន្ត្រីជំនាញ បានរកឃើញទំនិញខូចគុណភាព និងហួសកាលបរិច្ឆេទប្រើប្រាស់ មួយចំនួនដូចខាងក្រោម៖
– ទឹកក្រូចចម្រុះ ចំនួន ១៥ ដបធំ និង ១៨ យួរ ស្មើនឹង ៨២.៨ លីត្រ
– ទឹកដោះគោជូរ ចំនួន ០៤ ប្រអប់ ស្មើនឹង ០.៧២ លីត្រ
– ទឹកផ្លែឈីចម្រុះ ចំនួន ៤៣ ដប ស្មើនឹង ១១.៤៤ លីត្រ
– នំចម្រុះ ចំនួន ០៩ កញ្ចប់ ស្មើនឹង ៤,១៥២ គីឡូក្រាម
– ដំណាបចេក ចំនួន ២០ កញ្ចប់ ស្មើនឹង ០.៤ គីឡូក្រាម
– មីម៉ាម៉ា ចំនួន ១៩៥ កញ្ចប់ ស្មើនឹង ១៧.៧០ គីឡូក្រាម
– ចាហួយដូង ចំនួន ០៨ កេស ស្មើនឹង ៤៨ គីឡូក្រាម។

ក្រោយមក មន្ត្រីកាំកុងត្រូលបានធ្វើកំណត់ហេតុដកហូត ទំនិញទាំងនោះយកទៅកម្ទេចចោលតាមនីតិវិធី ទន្ទឹមនិងនោះមន្ត្រីជំនាញក៏បានធ្វើការណែនាំដល់អាជីវករផ្សេងទៀត ឲ្យយល់ដឹង និងអនុវត្តទៅតាមច្បាប់ ស្តីពីការគ្រប់គ្រងគុណភាព សុវត្ថិភាព លើផលិតផល ទំនិញ និងសេវា ជៀសវាងបង្កផលប៉ះពាល់ ដល់សុខភាពប្រជាពលរដ្ឋ និងអាចប្រឈមចំពោះមុខច្បាប់ថែមទៀត៕