បន្ទាយមានជ័យៈ គ្រោះថ្នាក់ចរាចរណ៍ដ៏គួរឲ្យរន្ធត់មួយ បង្កឡើងដោយរថយន្តដឹកឥវ៉ាន់បុកម៉ូតូ១គ្រឿងពេញទំហឹងលាន់ដូចរន្ទះ បណ្តាលឲ្យម្ចាស់ម៉ូតូធ្លាយពោះវៀនស្លាប់យ៉ាងណោចអាធ័ម នៅហ្នឹងកន្លែងកើតហេតុ។
ឧបទ្ទវហេតុ ដ៏រន្ធត់នេះ បានកើងឡើង កាលពីវេលាម៉ោង១យប់រំលងអាធ្រាត្រ ឈានចូលថ្ងៃទី១២ ខែកក្កដា ឆ្នាំ២០១៦ នៅលើថ្នល់ជាតិលេខ៦ ត្រង់ចំណុចផ្ទះសំណាក់មានជ័យ ក្នុងភូមិ១ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។
នគរបាលចរាចរណ៍ផ្លូវគោក បានឲ្យដឹងថា ជនរងគ្រោះមានឈ្មោះ អោក សុវណ្ណា ភេទប្រុស អាយុ២៤ឆ្នាំ រស់នៅក្នុងភូមិកោះកែង ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ។
នគរបាល បានបន្ដថា មុនពេល កើតហេតុនោះ បុរសជនរងគ្រោះបានជិះម៉ូតូម៉ាកឆាលី ពណ៌ស គ្មានស្លាកលេខ ចេញពីស្រុកព្រះនេត្រព្រះឆ្ពោះ មកផ្ទះនៅស្រុកមង្គលបូរី លុះជិះមកដល់ចំណុចកើតហេតុនោះស្រាប់តែមានរថយន្តធំដឹកឥវ៉ាន់ បើកចេញពីខេត្តបន្ទាយមានជ័យឆ្ពោះទៅខេត្តសៀមរាប ច្រាសទិសគ្នាក្នុងស្ថានភាពមេឃងងឹតឈឹង ក្នុងល្បឿនលឿនទៀតលុះបើកមកដល់ចំណុចកើតហេតុ ស្រាប់តែមានរថយន្ត១គ្រឿងរេចង្កូតទៅបុកនិងម៉ូតូឆាលី កំពុងបើកពីមុខខ្លួនពេញទំហឹង បណ្តាលឲ្យធ្លាយពោះវៀនស្លាប់ភ្លាមមួយរំពេច ក្រោយពីបុកហើយរថយន្តបានបើកគេចមកដល់ចំណុចស្រុកព្រះនេត្រព្រះ ទើបនគរបាលចាប់បាន។
ប្រភពដដែល បានបន្ថែមទៀតថា មួយសន្ទុះក្រោយមកនគរបាលចរាចរណ៍បានមកដល់ចំណុចកើតហេតុ ហើយក៏បានយកសព និងម៉ូតូមកតម្កល់ទុកនៅវត្តស្វាយ ដើម្បីស្វែងរកបងប្អូននៅពេលព្រឹក។ លុះនៅម៉ោងជិត១០ព្រឹកទើបស្វែងរកបងប្អូនឃើញ។ សពត្រូវបាននគរចាលប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី។ ចំណែករថយន្តបង្ក និងអ្នកបើកត្រូវបានបញ្ជូនមកស្នងការ ដើម្បីកសាងសំណុំរឿងទៅតាមនីតិវិធី៕
មតិយោបល់