កំពតៈ បុរស២នាក់ បានផឹកស៊ីជាមួយគ្នា ក្រោយពីស្រវឹងរៀងៗខ្លួន ក៏បានទាស់ពាក្យសំដីគ្នា ធ្វើឲ្យបុរសម្នាក់ខឹងច្រឡោត រហូតឈានដល់ប្រើអំពើហិង្សាទាញកូនកាំបិតចុងស្រួច ចាក់ទៅលើបុរសជាគូទំនាស់មួយកាំបិត បណ្តាលឲ្យរងរបួសដើមដៃខាងឆ្វេងហូរឈាមជោគអាវ។

ករណីនេះ បានកើតឡើងកាលពីវេលាម៉ោង៩ និង២០នាទី យប់ថ្ងៃទី១១ ខែកក្កដា ឆ្នាំ២០១៦ ស្ថិតក្នុងភូមិ១ ឧសភា សង្កាត់កំពង់កណ្តាល ក្រុងកំពត។

មន្ត្រីនគរបាលមូលដ្ឋានបានឲ្យដឹងថា ជនរងគ្រោះមានឈ្មោះ ឈឹម សុខជា ភេទប្រុស អាយុ៣៤ឆ្នាំ រស់នៅភូមិស្វាយធំ សង្កាត់ក្រាំងអំពិល ខេត្តកំព រងរបួសចំដើមដៃឆ្វេង។ ចំណែកជនល្មើស ឈ្មោះជុំ សារុន ហៅមិត្ត ភេទប្រុស អាយុ៣៨ឆ្នាំ រស់នៅភូមិ សង្កាត់ ជាមួយជនរងគ្រោះដែរ។

មន្ត្រីនគរបាលបន្តថា ជនរងគ្រោះ និងជនល្មើស ជាមិត្តភក្តិនិងគ្នា ខណៈផឹកស៊ីជាមួយគ្នា និងជាមួយមិត្តភក្ដិដ៏ទៃទៀត ស្រវឹងជោគខ្លួន បង្កើតទំនាស់ពាក្យសំដីគ្នា ក៏ធ្វើឲ្យជនល្មើស ឈានទៅធ្វើសកម្មភាព ចាក់លើជនរងគ្រោះ ១កូនកាំបិតដងឈើ ត្រូវចំដើមដៃខាងឆ្វេង បណ្តាលឲ្យរងរបួសធ្ងន់។ ក្រោយហេតុជនរងគ្រោះ ត្រូវបានកម្លាំងនគរបាលមូលដ្ឋាន បញ្ជូនទៅព្យាបាលនៅ មន្ទីរពេទ្យបង្អែកខេត្ត។ ដោយឡែកជនបង្កបានរត់គេចខ្លួនបាត់។

ក្រោយពីមានហេតុការខាងលើ កម្លាំងសមត្ថកិច្ចបាន ចុះស្រាវជ្រាវ រហូតឈានទៅឃាត់ខ្លួនជនសង្ស័យបាន នៅវេលាម៉ោង៨យប់ ថ្ងៃទី១២ ខែកក្កដា ឆ្នាំ២០១៦ នៅចំណុចភូមិស្វាយធំ សង្កាត់ក្រាំងអំពិល ក្រុងកំពត ដែលផ្ទះជនសង្ស័យ នៅទីនោះ ហើយនាំខ្លួន មកកាន់ស្នងការខេត្ត ដើម្បីធ្វើការសាកសួរ និងកសាងសំណុំរឿងបញ្ជូនទៅតុលាការចាត់ការតាមច្បាប់៕